کراچی میں جماعت اسلامی پاکستان کی جانب سے مقبوضہ کشمیر کے عوام سے اظہارِ یکجہتی کے لیے منعقدہ ’آزادی کشمیر مارچ‘ میں ہزاروں افراد نے شرکت کی۔

جماعت اسلامی پاکستان نے 5 اگست کو بھارت کے یک طرفہ اقدام کے بعد بھارت کے سنگین مظالم کے خلاف شاہراہ فیصل پر آزادی کشمیر مارچ کا انعقاد کیا۔

مارچ کے دوران کراچی میں موسلا دھار بارش بھی ہوئی لیکن مارچ میں موجود ہزاروں خواتین اور بچوں اور دیگر شرکا نے کشمیر سے یک جہتی کا اظہار کیا اور کشمیریوں کا اپنی حمایت کا یقین دلایا

امیر جماعت اسلامی سینیٹر سراج الحق نے اپنے خطاب میں حکومت سے مطالبہ کیا کہ وہ بھارت سے شملہ معاہدہ منسوخ کردے۔

انہوں نے بھارت کے وزیراعظم نریندر مودی کو مخاطب کرکے کہا کہ ’تمہیں انتہا پسند ہندو تنظیم آر ایس ایس پر فخر ہے لیکن یاد رکھنا ہم بھی غزنوی کی اولاد اور احمد شاہ ابدالی کے بھائی ہیں، سومناتھ ایک مرتبہ پھر پاش پاش کرسکتے ہیں‘۔

مارچ سے سینیٹ کے سابق چیئرمین رضاربانی سمیت دیگر جماعتوں کے رہنماؤں نے بھی خطاب کیا۔