کراچی میں مون سون کی بارشوں کا پہلا سلسلہ جولائی کے اواخر میں شروع ہوا تھا جو تاحال جاری ہے اور محکمہ موسمیات کےمطابق یہ سلسلہ 30 ستمبر تک جاری رہے گا تاہم بارشوں کے بعد شہریوں کو مکھیوں نے اذیت میں مبتلا کردیا ہے۔

شہر میں کئی ہفتوں تک جاری رہنے والی بارشوں کے بعد نہ صرف پانی جمع ہوا بلکہ جگہ جگہ کچرے کے ڈھیر لگ گئے اور کیچڑ کے باعث مکھیوں نے پورے شہر کو لپیٹ میں لیا جس سے مارکیٹوں، سبزی اور گوشت کی دکانوں کو بھی نہیں بخشا۔

مکھیوں کے حوالے سے کراچی کے ایک رہائی عبدالعزیز کا کہنا تھا کہ 'میں نے اپنی زندگی میں مکھیوں کی اس طرح خوف ناک موجودگی کو کبھی نہیں دیکھا'۔

ان کا کہنا تھا کہ 'مکھیوں کے مارکیٹ میں کھانے کی اشیا کو گھیر رکھا ہے اور خاص کر فروٹ پر زور دار انداز میں بھنبھنا رہی ہیں'۔

سرجانی ٹاؤن میں گوشت کے تاجر زاہد علی کا کہنا تھا کہ 'اگر کسٹمر گوشت لینے آتے ہیں تو مکھیوں کو دیکھ کر بھاگ جاتے ہیں جبکہ مارکیٹ میں کام کرنے والے افراد میں بیماریوں میں بھی اضافہ ہوا ہے'۔