سندھ حکومت کا کورونا وائرس سے بچاؤ کی ویکسین تیار کرنے والے کیلئے انعام کا اعلان
سندھ حکومت نے کورونا وائرس کے خطرے سے نمٹنے کے لیے اعلان کیا ہے کہ جو فرد اس وائرس کی ویکسین تیار کرے گا اسے انعام دیا جائے گا۔
صوبے کے وزیر اطلاعات ناصر حسین شاہ نے ایک ویڈیو پیغام میں کہا کہ 'کورونا وائرس سے بچاؤ کی ویکسین تیار کرنے والوں کو انعام دیا جائے گا، (اس سلسلے) میں تمام ریسرچ انسٹی ٹیوٹ اور ریسرچ طلبہ اس میں ہماری مدد کریں'۔
مزید پڑھیں: پاکستان میں کورونا وائرس کا مقامی طور پر منتقل ہونے والا پہلا کیس
انہوں نے کہا کہ 'جو بھی صحیح ویکسین بنائے گا اس کو انعام بھی دیا جائے گا اور اسے تمام اخراجات بھی سندھ حکومت مہیا کرے گی'۔
قیدیوں کے عدالت میں پیشی سے استثنیٰ پر بھی غور
دوسری جانب حکومت سندھ کورونا وائرس سے بچاؤ کے پیش نظر قیدیوں کے عدالت میں پیشی سے استثنیٰ پر بھی غور کر رہی ہے۔
ترجمان سندھ حکومت مرتضیٰ وہاب کا کہنا تھا کہ جیلوں میں موجود قیدیوں کو مخصوص مدت کے لیے عدالتوں میں نہ لایا جائے۔
انہوں نے کہا کہ قیدیوں کی پیشی سے استشنی کے لیے سندھ حکومت عدالت عالیہ سے رجوع کرے گی، ساتھ ہی ان کا کہنا تھا کہ سندھ کابینہ نے بھی کورونا وائرس کے سبب قیدیوں کو محدود کرنے کی تجویز دی تھی۔
سندھ حکومت کے ترجمان کا کہنا تھا کہ وزیراعلیٰ کی ہدایت پر ایڈووکیٹ جنرل سندھ ہائیکورٹ سے رجوع کریں گے جبکہ وائرس کے پھیلاؤ کو روکنے کے لیے عام سائلین کی بھی عدالتوں میں آمد و رفت محدود کرنے کی درخواست کی جائے گی۔
خیال رہے کہ دنیا بھر کو متاثر کرنے والی عالمی وبا پاکستان میں بھی پھیلتی جارہی ہے اور اس سے سب سے زیادہ صوبہ سندھ متاثر ہوا ہے اور اب تک صوبے میں اس کے 15 کیسز سامنے آچکے ہیں۔
یہ بھی پڑھیں: کراچی میں 'پی ایس ایل' کے میچز شائقین کے بغیر ہوں گے، وزیر اعلیٰ سندھ
سندھ میں کورونا وائرس کے 14 کیسز کراچی جبکہ ایک حیدرآباد میں سامنے آیا ہے جبکہ ملک کے دیگر حصوں میں 5 کیسز گلگت بلتستان اور ایک بلوچستان میں آیا ہے جس کے بعد ملک میں مجموعی طور کیسز کی تعداد 21 ہوچکی ہے۔
پاکستان میں کورونا وائرس
- پاکستان میں کورونا وائرس کا پہلا کیس 26 فروری 2020 کو کراچی میں سامنےآیا۔
- 26 فروری کو ہی معاون خصوصی برائے صحت ڈاکٹر ظفر مرزا نے ملک میں مجموعیطور پر 2 کیسز کی تصدیق کی۔
- 29 فروری کو ڈاکٹر ظفر مرزا نے ملک میں مزید 2 کیسز کی تصدیق کی، جس سےاس وقت تعداد 4 ہوگئی تھی۔
- 3 مارچ کو معاون خصوصی نے کورونا کے پانچویں کیس کی تصدیق کی۔
- 6 مارچ کو کراچی میں کورونا وائرس کا ایک اور کیس سامنے آیا، جس سےتعداد 6 ہوئی۔
- 8 مارچ کو شہر قائد میں ہی ایک اور کورونا وائرس کا کیس سامنے آیا۔
- 9 مارچ کو ملک میں ایک ہی وقت میں سب سے زیادہ کورونا وائرس کے 9 کیسزکی تصدیق کی گئی تھی۔
- 10 مارچ کو ملک میں کورونا وائرس کے 3 کیسز سامنے آئے تھے جن میں سے دوکا تعلق صوبہ سندھ اور ایک کا بلوچستان سے تھا، جس کے بعد کیسز کیمجموعی تعداد 19 جبکہ سندھ میں تعداد 15 ہوگئی تھی۔
تاہم بعد ازاں سندھ حکومت کی جانب سے یہ تصحیح کی گئی تھی 'غلط فہمی' کے باعث ایک مریض کا 2 مرتبہ اندراج ہونے کے باعث غلطی سے تعداد 15 بتائی گئی تھی تاہم اصل تعداد 14 ہے، اس تصحیح کے بعد ملک میں کورونا کیسز کی تعداد 10 مارچ تک 18 ریکارڈ کی گئی۔
- 11 مارچ کو اسکردو میں ایک 14 سالہ لڑکے میں کورونا وائرس کی تصدیق ہوئی تھی، جس کے بعد مجموعی تعداد 19 تک پہنچی تھی۔
- 12 مارچ کو گلگت بلتستان کے ضلع اسکردو میں ہی ایک اور کیس سامنے آیاتھا جس کے بعد ملک میں کورونا کے کیسز کی تعداد 20 تک جاپہنچی تھی۔