سعودی عرب کے ولی عہد محمد بن سلمان نے مشرق وسطیٰ میں آئل ٹینکرز پر ہونے والے حملوں کا ذمہ دار ایران کو ٹھہراتے ہوئے کہا کہ وہ ملک کو دی جانے والی دھمکیوں سے نمٹنے کے لیے کسی قسم کی ہچکچاہٹ محسوس نہیں کریں گے۔

گزشتہ ہفتے عمان کے ساحل کے قریب 2 آئل ٹینکرز کو دھماکا خیز مواد سے نشانہ بنایا گیا تھا اور یہ ایک ماہ کے دوران آئل ٹینکرز پر ہونے والا دوسرا حملہ تھا، جسے امریکا اور ایران کے درمیان جاری کشیدگی کے تناظر میں دیکھا جارہا ہے۔

فرانسیسی خبر رساں ادارے اے ایف پی کے مطابق عربی روزنامہ الشراق الوسط کو دیئے گئے انٹرویو محمد بن سلمان کا کہنا تھا کہ 'ہم خطے میں جنگ نہیں چاہتے لیکن ہم اپنے عوام کو، ملک کے استحکام کو اور اپنے مفاد کو دی جانے والی دھمکیوں کا جواب دینے میں ہچکچاہٹ محسوس نہیں کریں گے'۔

مزید پڑھیں: خلیج عمان میں 2 تیل بردار بحری جہازوں پر ' حملہ '

ان کا مزید کہنا تھا کہ 'ایران نے تہران میں جاپانی وزیراعظم کے مہمان ہونے کا بھی خیال نہیں کیا اور ان کی سفارتی کوششوں کا یوں جواب دیا کہ خطے میں 2 ٹینکرز پر حملہ کیا گیا جن میں سے ایک جاپانی تھا'۔

اس کے علاوہ انہوں نے 12 مئی کو متحدہ عرب امارات کے پورٹ فجیرہ پر 4 آئل ٹینکروں پر ہونے والے حملوں کا ذمہ دار بھی ایران اور خطے میں موجود ان کی پراکسیز کو قرار دیا۔

محمد بن سلمان نے سوڈان کی صورتحال پر تبصرہ کرتے ہوئے کہا کہ ’ہم سوڈان میں امن و استحکام کے خواہاں ہیں، سعودی عرب سوڈان میں خوشحالی اور ترقی کے لیے وہاں کے عوام کی مختلف شعبوں مدد کرتا رہے گا‘۔

سعودی صحافی جمال خاشقجی کے قتل کے معاملے پر ولی عہد نے کہا کہ ہم اس کے دردناک قتل کے ذمہ داروں کا مکمل احتساب کریں گے۔

انہوں نے کہا کہ سعودی صحافی کے قتل پر سیاست بند ہونی چاہیے، اگر کسی کے پاس اس قتل سے متعلق شواہد ہیں تو وہ سعودی عدالتوں میں پیش کرے۔

خیال رہے کہ اس سے قبل امریکی صدر ڈونلڈ ٹرمپ نے بھی متحدہ عرب امارات اور عمان کے ساحل پر آئل ٹینکرز پر ہونے والے حملوں کی ذمہ داری ایران پر عائد کی تھی اور ساتھ ہی ایران کی تردید کو بھی مسترد کردیا تھا۔

سعودی عرب، امریکا کا خطے میں انتہائی قریبی اتحادی تصور کیا جاتا ہے اور دونوں ہی ممالک کے ایران سے تعلقات انتہائی کشیدہ ہیں۔

گزشتہ دنوں امریکی فوج کی جانب سے فوٹیج جاری کی گئی تھیں جس کے حوالے سے دعویٰ کیا جارہا تھا کہ اس میں ایرانی پیٹرولنگ کشتی کو ایک آئل ٹینکر کے ساتھ 'کارروائی' کرتے ہوئے دیکھا جاسکتا ہے۔

یہ بھی پڑھیں: خلیج عمان میں ٹینکر پر حملے سے کشیدگی خطرناک حد تک بڑھ گئی ہے، یو اے ای

گزشتہ روز متحدہ عرب امارات کے وزیر خارجہ شیخ عبداللہ بن زیاد النہیان نے عالمی طاقتوں سے 'بین الاقوامی کشیدگی روکنے اور توانائی کی سپلائی لائن کو محفوظ بنانے' کا مطالبہ کیا تھا۔

خطے میں کشیدگی کو کم کرنے کی کوششوں میں مصروف متحدہ عرب امارات کے وزیر خارجہ نے مزید کہا کہ 'ہم پُر امید ہیں کہ ایران سے وسیع تعلقات سے متعلق فریم ورک بنا لیں گے'۔

علاوہ ازیں سعودی عرب کے وزیر برائے توانائی نے حالیہ 'دہشت گردی' کے واقعہ کے بعد توانائی کی ترسیل کو لاحق خطرات کا 'فوری اور فیصلہ کن' جواب دینے کا مطالبہ کیا تھا۔