صوابی کی مقامی عدالت نے عوامی نیشنل پارٹی (اے این پی) کے رہنما عظیم خان یوسفزئی کی ضمانت منظور کرلی ہے۔

ڈان نیوز کے مطابق رہنما اے این پی عظیم خان یوسفزئی سماعت کے لیے عدالت میں پیش ہوئے، جوڈیشل مجسٹریٹ بدر منیر خان نے مقدمے کی سماعت کی۔

جوڈیشل مجسٹریٹ بدر منیر خان نے اے این پی کے مقامی رہنما کی ضمانت منظور کرتے ہوئے عظیم خان کو 90 ہزار روپے کے مچلکے جمع کرانے کا حکم بھی دے دیا۔

یاد رہے کہ گزشتہ روز عوامی نیشنل پارٹی نے انتخابات میں دھاندلی کےخلاف احتجاجی مظاہرے میں اداروں کے خلاف نعرے بازی کی تھی جس کے بعد اے این پی کے رہنما عظیم یوسفزئی کے گھر پر پولیس نے چھاپہ مارتے ہوئے انہیں گرفتار کرلیا تھا اور انہیں صوابی پولیس اسٹیشن منتقل کردیا تھا۔