’پاک-بھارت کشیدگی کے خاتمے کیلئے عالمی برادری اپنا کردار ادا کرے‘
اسلام آباد: ناروے کے سابق وزیر اعظم جیل میگنے بونڈویک نے کہا ہے کہ اس بات میں کوئی شبہ نہیں کہ بھارت کے زیر تسلط کشمیر میں انسانی حقوق کی خلاف ورزیاں ہورہی ہے۔
ڈان اخبار کی رپورٹ کے مطابق اس کے ساتھ انہوں نے بین الاقوامی برادری پر زور دیا کہ پلوامہ حملے کے بعد سے پاکستان اور بھارت کے درمیان پیدا ہونے والی کشیدگی کو کم کرنے میں اپنا کردار ادا کریں۔
آزاد کشمیر کے صدر مسعود خان کے ہمراہ کشمیر ہاؤس میں صحافیوں سے گفتگو کرتے ہوئے ان کا کہنا تھا کہ جب بھی دوسرے ممالک نے بھارت سے کشمیر کا مسئلہ حل کرنے کا مطالبہ کیا تو بھارت نے جواب میں اسے دو طرفہ مسئلہ قرار دیا۔
یہ بھی پڑھیں: پاک-بھارت کشیدگی پر ہمیں تکلیف ہوتی ہے، سعودی وزیرخارجہ
چنانچہ اگر یہ دو طرفہ مسئلہ ہی ہے تو بھی دونوں ممالک کے درمیان اس کے حل کے لیے مذاکرات ہونے چاہیئں، مسئلہ کشمیر کا فوجی حل ممکن نہیں اس لیے دونوں فریقین کو بات چیت کا آغاز کردینا چاہیے۔
انہوں نے کہا کہ کشمیر میں انسانی حقوق کی خلاف ورزی پر اقوامِ متحدہ میں متعدد قرار دادیں منظور کی جاچکی ہیں، انہوں نے دونوں ممالک سے اپیل کی کہ صورتحال کو معمول پر لائیں۔