رمیز کا وہاب کو کپتان بنانے کا مشورہ
سابق کپتان رمیز راجا نے فاسٹ باﺅلر وہاب ریاض کو ون ڈے کے لیے پاکستان کرکٹ ٹیم کا اگلا کپتان بنانے کا مشورہ دیا ہے۔
کرکٹ ویب سائٹ سے بات کرتے ہوئے رمیز راجا نے کہا کہ آسٹریلیا کے خلاف ورلڈکپ کوارٹر فائنل میں وہاب ریاض کی باﺅلنگ دیکھ کر وہ قائل ہوگئے ہیں کہ فاسٹ باﺅلر جارحانہ انداز، جوش اور جذبات کے ساتھ اچھے کپتان بن سکتے ہیں۔
خیال رہے کہ پاکستان کے ون ڈے کپتان مصباح الحق نے ریٹائرمنٹ کا اعلان کردیا ہے اور رمیز راجا نے قومی سلیکٹرز پر زور دیا ہے کہ وہ نوجوانوں کو اس ذمہ داری کے لیے آگے لائیں۔
ان کا کہنا تھا کہ وہاب ریاض کا جوش و جذبہ پاکستان کرکٹ کو ٹریک پر لانے کے لیے کافی ثابت ہوگا۔
ان کے بقول پاکستان کرکٹ جذبے، جوش اور ناقابل پیشگوئی رویے پر مشتمل ہے جو اسے پرستاروں کے لیے دل پسند بناتی ہے مگر ورلڈکپ میں ٹیم میں جارحیت کی کمی نظرآئی جس نے مجھے مایوس کیا۔
خیال رہے کہ وہاب ریاض نے ورلڈکپ کے سات میچز میں سولہ وکٹیں 23 کی اوسط کے ساتھ لے کر ٹاپ فائیو باﺅلرز میں جگہ بنائی تھی، خاص طور پر کوارٹر فائنل میں ان کی باﺅلنگ کی تعریف ہر ایک نے کی۔
رمیز راجا کا ماننا ہے کہ یہ درست وقت ہے کہ پاکستان وہاب کو اس کی کارکردگی کی بنیاد پر کپتانی کے لیے منتخب کرلے۔
تبصرے (1) بند ہیں