امیتابھ بچن اور عامر خان نے اب تک کسی فلم میں اکٹھے کام نہیں کیا مگر لگتا ہے کہ اب یہ دونوں سپراسٹارز ایک پراجیکٹ میں ایک ساتھ نظر آئیں گے۔

ٹائمز آف انڈیا کے مطابق ایسی اطلاعات سامنے آرہی ہیں کہ ان دونوں اسٹارز کو دھوم سیریز کے ڈائریکٹر وجے کرشنا اچاریہ اپنی نئی فلم ٹھگ میں کاسٹ کریں گے۔

اگرچہ عامر خان نے اس حوالے سے نہ تو تصدیق کی ہے اور نہ تردید، مگر انہوں نے امیتابھ کے ساتھ کام کرنے کے خیال پر جوش و خروش کا اظہار ضرور کیا ہے۔

ان کا کہنا تھا " کون ہوگا جو لیجنڈری بگ بی کے ساتھ کام کرنا نہیں چاہتا؟ وہ ایسی شخصیت ہیں جنھیں میں اپنے آئیڈیل کے طور پر دیکھتا ہوں اور میں ان کا بڑا پرستار ہوں"۔

انہوں نے مزید کہا " اگر مجھے ان کے ساتھ کام کرنے کا موقع ملا تو یہ میرے لیے خواب کی تعبیر پانے جیسا ہوگا، مجھے توقع ہے کہ ایسا ہوگا اور جب بھی ایسا ہوگا آپ سب کو معلوم ہوجائے گا"۔

ٹھگ ایک ایکشن ایڈونچر فلم ہوگی جو یش راج فلمز کے بینر تلے تیار کی جائے گی۔

عامر خان اس وقت اپنی فلم دنگل کی شوٹنگ میں مصروف ہیں جبکہ امیتابھ کی فلم پنک کا ٹریلر گزشتہ دنوں سامنے آیا ہے۔