مقبوضہ کشمیر میں گزشتہ سال 8 جولائی کو بھارتی فورسز کے ہاتھوں شہید ہونے والے حزب المجاہدین کے نوجوان کمانڈر برہان مظفر وانی کی پہلی برسی کشمیر اور پوری دنیا میں موجود کشمیریوں نے عقیدت سے منائی۔

مقبوضہ کشمیر میں حریت رہنماؤں کی اپیل پر بھرپور احتجاج کیا گیا جبکہ ریلیوں کو روکنے کے لیے بھارتی فورسز نے کارروائیاں کیں اور مظاہرین پر لاٹھی چارج کیا اور آنسو گیس کا استعمال کیا۔

پوری وادی میں مارکیٹیں اور دکانیں اور تجارتی مراکز سمیت تمام اہم مقامات بند رہے۔

بھارتی فوج نے سید علی گیلانی، میرواعظ، یاسین ملک سمیت کشمیری رہنماؤں کو نظر بند اور گرفتار کرکے احتجاجی مظاہروں کی قیادت کرنے سے روکا۔

حزب المجاہدین کے سپریم کمانڈر صلاح الدین نے آزاد کشمیر کے دارالحکومت مظفر آباد میں ریلی کی قیادت کی اور برہان وانی کو خراج عقیدت پیش کیا۔