بلوچستان میں داعش موجود نہیں،وزیر اعلی

ای میل

وزیر اعلی بلوچستان ڈاکٹر عبدالمالک بلوچ    ۔(فائل فوٹو)۔
وزیر اعلی بلوچستان ڈاکٹر عبدالمالک بلوچ ۔(فائل فوٹو)۔

کوئٹہ : وزیر اعلی بلوچستان ڈاکٹر عبدالمالک بلوچ کا کہنا ہے کہ بعض عناصر طاقت کے ذریعے اپنا ایجنڈا نافذ کرنا چاہتے ہیں۔

کوئٹہ میں ایک تقریب کے بعد میڈیا سے بات چیت کرتے ہوئے ان کا کہنا تھا کہ بلوچستان میں داعش (آئی ایس آئی ایس) کی موجودگی کی کوئی اطلاع نہیں ہے البتہ ایسے بنیاد پرست موجود ہیں جن کے خیالات داعش سے مطابقت رکھتے ہیں۔

ان کا کہنا تھا کہ صوبے میں ماضی کے حکمرانوں کی پالیسیاں امن عامہ کی خرابی کی وجہ بنی ہیں جس سے علیحدگی پسندوں اور فرقہ وارانہ حملوں میں اضافہ ہوا۔

ڈاکٹر عبدالمالک بلوچ نے کہا کہ صوبے کے روایتی امن کی بحالی کے لیے حکومت سیاسی کوششیں کر رہی ہے،امن کے لیے بات چیت کی راہ اپنائی جائے گی۔

ان کا کہنا تھا کہ محرم الحرام میں دہشت گردی کے خطرات کے پیش نظر کوئٹہ سمیت صوبے بھر میں سیکیورٹی کے فول پروف انتظامات کئے گئے ہیں۔۔

ڈان نیوز کے مطابق انہوں نے بتایا کہ کوئٹہ میں محرم الحرام کے دوران مشکلات درپیش رہتی ہیں، انہی خطرات کے پیش نظر کوئٹہ، مچھ اور صوبے کے دیگر علاقوں میں سیکورٹی کے بہترین انتظامات کئے گئے ہیں تاکہ کوئی ناخوشگوار واقعہ پیش نہ آ سکے۔