بولی وڈ اداکار شاہد کپور اور ان کی اہلیہ میرا راجپوت کے ہاں پہلے بچے کی پیدائش گزشتہ سال 26 اگست کو ہوئی تھی، جس کا نام ان دونوں نے اپنا نام جوڑ کر 'میشا' رکھا تھا۔

شاہد کپور کی بیٹی کی پیدائش کے بعد سے اب تک اداکار اپنی بیٹی کو لے کر کافی حفاظتی رہے ہیں، وہ جہاں بھی نظر آئے انہوں نے اپنی بیٹی کو کیمرا کی آنکھوں، میڈیا اور مداحوں سے چھپا کر رکھا۔

مزید پڑھیں: شاہد کپور کے گھر بیٹی کی پیدائش

شاہد کپور نے سماجی رابطے کی ویب سائٹ ٹوئٹر پر چند رپورٹرز کو ان کی بیٹی کی قریب سے تصاویر لینے پر بھی تنقید کا نشانہ بنایا تھا۔

اداکار نے اتنے عرصے میں اپنی بیٹی کی کوئی تصاویر سوشل میڈیا پرمداحوں سے شیئر نہیں کی، جس کے باعث ان کے چاہنے والوں کا 'میشا' کی ایک جھلک دیکھنے کا لگاؤ حد سے زیادہ بڑھنے لگا۔

شاہد کپور نے اس دوران اپنی بیٹی کے پیروں کی ایک جھلک بھی شیئر کی۔

یاد رہے کہ اپنی جلد ریلیز ہونے والی فلم 'رنگون' کے حوالے سے رکھی ایک پریس کانفرنس میں شاہد کپور نے کہا تھا کہ وہ جلد اپنی بیٹی کی پہلی تصویر دنیا بھر سے شیئر کریں گے۔

اب شاہد کپور نے انسٹاگرام اکاونٹ پر اپنی اور بیٹی کی ایک تصویر شیئر کی، تاہم اس میں کوئی بھی میشا کو دیکھ نہیں پایا۔

یہ بھی پڑھیں: شاہد کپور شادی کے بندھن میں بندھ گئے

اور آخر کار شاہد کپور نے اپنی بیٹی میشا کی پہلی تصویر اہلیہ میرا راجپوت کے ہمراہ ریلیز کردی، جس میں ان کی بیٹی کیمرے کی جانب دیکھتی نظر آئی۔

اس تصویر میں میشا اپنی والدہ میرا کے ہمراہ نہایت خوبصورت انداز میں موجود ہے، جس پر شاہد نے لکھا 'ہیلو ورلڈ'۔

خیال رہے کہ شاہد کپور نے دہلی کی رہنے والی میرا راجپوت سے 7 جولائی 2015 کو شادی کی تھی۔