جنوبی افریقہ کرکٹ ٹیم کے کپتان فاف ڈیوپلیسی کی قیادت میں پاکستان کے خلاف تین میچوں کی ٹی ٹوئنٹی سیریز کے لیے لاہور پہنچنے والی ورلڈ الیون نے قذافی اسٹیڈیم میں پریکٹس کی۔

پاکستان میں بین الاقوامی کرکٹ کی بحالی کے سلسلے میں ورلڈ الیون کی پاکستان آمد پر ان کا پرتپاک استقبال کیا گیا اور پاکستان کرکٹ بورڈ (پی سی بی) کےچیئرمین نجم سیٹھی نے کھلاڑیوں سے ملاقات کی۔

پاکستان کرکٹ ٹیم کے کپتان سرفراز احمد نے سیریز کا حصہ ہونے پر فخر کا اظہار کرتے ہوئے کہا کہ 'ہم بالخصوص جنوبی افریقہ کے مشکور ہیں کہ ان کے 5 سرفہرست کھلاڑیوں نے پاکستان آنے کی ہانمی بھری اور پاکستان آئے'۔

سرفرازاحمد نے دیگر ممالک کے بورڈ اور کھلاڑیوں کا بھی شکریہ ادا کرتے ہوئے کہا کہ 'ہم جنوبی افریقہ کے علاوہ ویسٹ انڈیز، بنگلہ دیش، انگلینڈ، نیوزی لینڈ اور آسٹریلیا کے کرکٹ بورڈ اور کھلاڑیوں کا شکریہ ادا کرتے ہیں'۔

پاکستانی ٹیم اور ورلڈ الیون کے درمیان تین ٹی ٹوئنٹی میچوں کی سیریز کھیلی جائے گی اور پہلا میچ 12 ستمبر کو کھیلا جائے گا۔