ماہ صیام کاتیسرا اور آخری عشرہ شروع ہوتے ہی ملک بھر کی مساجد میں لاکھوں فرزندان اسلام اعتکاف میں بیٹھ گئے ہیں۔

جہنم کی آگ سے نجات کے اس عشرے میں لیلۃ القدر بھی موجود ہے جس کے لیے مساجد میں خصوصی دعاؤں کا اہتمام بھی کیا جاتا ہے۔

معتکفین سنت نبوی کی پیروی کرتے ہوئے اپنا زیادہ تر وقت خصوصی عبادات اور بخشش کی دعاؤں میں گزاریں گے۔

خیال رہے کہ رمضان المبارک کے آخری عشرے میں بڑی تعداد میں مسلمان اعتکاف کی سعادت حاصل کرتے ہیں۔

اس سال بھی ملک بھر کی مساجد میں لاکھوں فرزندان توحید اعتکاف میں بیٹھ گئے ہیں۔

لاہور میں بادشاہی مسجد، جامعہ نعمیہ، جامعہ اشرفیہ اور داتا دربار مسجد سمیت چھوٹی بڑی مساجد میں بھی معتکفین آخری عشرے کی رحمتیں سمیٹنے میں مصروف ہیں۔

داتادربار مسجد میں پچیس سو کے قریب معتکفین کے لیے سحر و افطار کے انتظامات بھی کیے گئے ہیں۔

روشنیوں کے شہر کراچی میں بھی اعتکاف کے بڑے اجتماعات نیومیمن مسجد بولٹن مارکیٹ، جناح مسجد برنس روڈ، رحمانیہ مسجد طارق روڈ، گلزار حبیب مسجد سولجر بازار سمیت دیگر مساجد میں ہوتے ہیں۔