سرفراز کی کپتانی میں قومی ٹیم کی پانچویں ٹرافی
پاکستان نے فخرزمان اور امام الحق کی شاندار بلے بازی کی بدولت زمبابوے کے خلاف 5 میچوں کی سیریز میں 5-0 سے شکست دے کر سیریز میں کامیابی حاصل کرلی۔
قومی ٹیم نے سرفراز احمد کی قیادت میں پانچویں ایک روزہ سیریز کے فائنل میں کامیابی حاصل کرکے ٹرافی حاصل کرلی۔
پانچویں میچ میں فخر زمان نے 85 رنز کی شاندار اننگز کھیلی اور ایک روزہ کرکٹ میں تیز ترین ایک ہزار رنز بنانے کا عالمی ریکارڈ بھی توڑ دیا۔
فخر زمان سے قبل ویسٹ انڈیز کے ویوین رچرڈز، جنوبی افریقہ کے کوئنٹن ڈی کوک، انگلینڈ کے جوناتھن ٹروٹ اور کیون پیٹرسن اور پاکستان کے بابر اعظم مشترکہ طور پر تیز ترین ایک ہزار رنز بنانے والے بلے باز تھے، جنہوں نے یہ سنگِ میل 21 اننگز میں مکمل کیا تھا۔
تاہم فخرزمان نے 18 اننگز میں ایک ہزار رنز بنا کر یہ ریکارڈ بھی اپنے نام کرلیا۔
فخر زمان اور امام الحق ایک روزہ سیریز میں سب سے زیادہ رنز بنانے والی اوپننگ جوڑی بھی بن گئے، دونوں بلے بازوں کی جوڑی نے پانچ میچوں میں 71.71 کی اوسط سے 910 رنز بنائے، اس سے قبل ویسٹ انڈیز کی اوپننگ جوڑی ڈیسمنڈ ہینز اور گورڈن گرینج نے بھارت کے خلاف 1989 میں پانچ ون ڈے میچوں کی سیریز میں 58.80 کی اوسط سے 611 رنز بنائے تھے۔
فخر زمان نے 5 میچوں پر مشتمل سیریز میں 515 رنز بناکر سب سے زیادہ رنز بنانے کا ریکاڈ بھی اپنے نام کرلیا، اس سے قبل زمبابوے کے ہیملٹن مساکاڈزا نے کینیا کے خلاف 5 میچوں پر مشتمل سیریز میں 467 رنز بنائے تھے۔
تبصرے (0) بند ہیں