ورون اور عالیہ دور حاضر کے شاہ رخ اور کاجول

اپ ڈیٹ 30 اگست 2018

ای میل

دونوں نے 2012 میں ایک ساتھ کیریئر کا آغاز کیا—اسکرین شاٹ
دونوں نے 2012 میں ایک ساتھ کیریئر کا آغاز کیا—اسکرین شاٹ

بولی وڈ اداکار ورون دھون اور عالیہ بھٹ جو ان دنوں اپنی آنے والی فلم ‘کلنک’ کی تشہیر میں مصروف ہیں، اسکرین پر ان دونوں کی جوڑی کو بہت سراہا جاتا ہے۔

ان دونوں کی جوڑی کی خاص بات یہ ہے کہ انہوں نے ایک ساتھ ایک ہی فلم سے کیریئر کا آغاز کیا تھا، جس میں دونوں نے ایک دوسرے کے کلاس فیلو اور دوست کا کردار ادا کیا تھا۔

اگرچہ 2012 میں ریلیز ہونے والی فلم ‘اسٹوڈنٹ آف دی ایئر’ میں بھی عالیہ بھٹ ورون دھون کو چھوڑ کر سدھارتھ ملہوترا کی محبت بن جاتی ہیں۔

تاہم حقیقی زندگی میں بھی وہ ورون دھون کے بجائے رنبیر کپور کے زیادہ قریب ہے، لیکن پھر بھی ان دونوں کی جوڑی کو سراہا جاتا ہے۔

ورون دھون اور عالیہ بھٹ نے ‘اسٹوڈنٹ آف دی ایئر، کلنک، ہمپتی شرمیا کی دلہنیا، بدری ناتھ کی دلہنیا اور شدھی’ جیسی فلموں میں ایک ساتھ کام کیا ہے، جنہوں نے باکس آفس پر اچھی کمائی کرنے سمیت شائقین کو بھی خوب محظوظ کیا۔

ان دونوں کی جوڑی کو دور حاضر کی شاہ رخ اور کاجول کی جوڑی بھی قرار دیا جاتا ہے، کیوں کہ ماضی میں شاہ رخ اور کاجول نے بھی کئی ہٹ فلمیں دیں اور ابھی تک وہ بولی وڈ کی کامیاب آن اسکرین جوڑی مانی جاتی ہے۔

جلد وہ کلنک میں بھی ایک ساتھ نظر آئیں گے—اسکرین شاٹ
جلد وہ کلنک میں بھی ایک ساتھ نظر آئیں گے—اسکرین شاٹ

فلم کلنک کی تشہیر کے دوران فلم فیئر سے بات کرتے ہوئے ورون دھون نے تسلیم کیا کہ ان کے اور عالیہ بھٹ کے درمیان اچھے تعلقات ہیں اور وہ ایک دوسرے کے جذبات کو سمجھنے سمیت ایک دوسرے کا احترام بھی کرتے ہیں۔

ورون دھون نے عالیہ بھٹ کی تعریف کرتے ہوئے کہا کہ وہ ان کی خاص بات یہ ہے کہ وہ انہیں فلم کے سیٹ پر مشورے دیتی رہتی ہیں۔

ایک سوال کے جواب میں ورون دھون نے کہا کہ اگرچہ وہ دونوں بہترین دوست ہیں، تاہم اس کے باوجود وہ ایک دوسرے سے ذاتی زندگی سے متعلق کوئی بات شیئر نہیں کرتے۔

ورون دھون نے کہا کہ انہوں نے آج تک اپنی ذاتی زندگی یعنی محبت کے حوالے سے عالیہ بھٹ سے کوئی مشورہ نہیں کیا اور نہ ہی کچھ انہیں بتایا۔

ساتھ ہی انہوں نے کہا کہ عالیہ بھٹ بھی ان سے ذاتی زندگی کی باتیں شیئر نہیں کرتی اور نہ ہی ان سے محبت کے حوالے سے تجاویز مانگتی ہیں۔

واضح رہے کہ ان دنوں عالیہ بھٹ کی رنبیر کپور کے ساتھ محبت جب کہ ورون دھون کی نتاشا ڈلال کے ساتھ محبت کی چہ مگوئیاں جاری ہیں۔

دونوں کی کیمسٹری کو سراہا جاتا ہے—فوٹو: ٹائمز آف انڈیا
دونوں کی کیمسٹری کو سراہا جاتا ہے—فوٹو: ٹائمز آف انڈیا