اردن میں گزشتہ ایک ماہ کے دوران دوسری مرتبہ بارشوں اور خطرناک سیلاب سے درجنوں افراد جاں بحق اور کئی لاپتہ ہوگئے جبکہ سیاحوں کی بڑی تعداد بھی متاثر ہوگئی ہے۔

اردن کے جنوب مغربی علاقوں کے علاوہ بڑے شہروں معان، البترا، وادی موسیٰ اور دارالحکومت عمان کے قریبی علاقوں میں سیلاب سے تباہی پھیل گئی ہے۔

سیاحوں کی جنت سمجھے جانے والے تاریخی شہر البترا میں 4 ہزار سیاح پھنس گئے تھے تاہم حکام کا دعویٰ ہے کہ تمام سیاحوں کو محفوظ مقام پر منتقل کر دیا گیا ہے اور اب وہ محفوظ ہیں۔

اردن میں سیلاب سے ہونے والی ہلاکتوں سے متعلق موصول اطلاعات کے مطابق 11 افراد کی تصدیق ہوگئی ہے جبکہ کئی لاپتہ ہیں۔

قبل ازیں گزشتہ ماہ آنے والے سیلاب سے درجنوں افراد جاں بحق ہوئے تھے جن میں اکثریت بچوں کی تھی جس کے بعد وزیر تعلیم اور وزیر سیاحت نے اپنے عہدوں سے بھی استعفیٰ دیا تھا۔