اداکارہ مہوش حیات اگرچہ ان دنوں تمغہ امتیاز حاصل کرنے کی وجہ سے ہونے والی بے جا تنقید کی وجہ سے خبروں میں ہیں، تاہم ان کے مداحوں کے لیے اچھی خبر یہ ہے کہ ان کی آنے والی فلم کا ٹیزر جاری کردیا گیا۔

مہوش حیات، اظفر رحمٰن، زارا نور عباس اور محمود اسلم سمیت دیگر اداکاروں کی کاسٹ پر مبنی فلم رومانٹک، کامیڈی اور سسپنس سے بھرپور فلم ’چھلاوا‘ کا پہلا ٹیزر ٹریلر جاری کردیا گیا۔

ایک منٹ سے زائد دورانیے کے ٹیزر سے فلم کی مکمل کہانی کو سمجھنا مشکل ہے، تاہم اسے دیکھ کر اندازہ ہوتا ہے کہ فلم پیار، حسد، کچھ خاندانی اور ذاتی جھگڑوں سمیت محبت میں ہونے والی غلط فہمیوں کے گرد گھومتی ہے۔

ٹیزر ٹریلر میں جہاں مہوش حیات اور اظفر رحمٰن کو رومانس کرتے دکھایا گیا ہے، وہیں انہیں دوسرے مسائل کو حل کرتے ہوئے بھی دکھایا گیا ہے۔

ٹیزر میں جہاں مہوش حیات کو دلہن کے عروسی لباس میں دکھایا گیا ہے، وہیں انہیں شادی کے موقع پر کوئی راز سامنے آنے کے بعد ٹوٹتے، بکھرتے اور چیزوں کو توڑتے ہوئے بھی دکھایا گیا ہے۔

یہ بھی پڑھیں: وجاہت رؤف کا مہوش حیات کے ساتھ ’چھلاوا‘ کا اعلان

ٹیزر میں جہاں ان دونوں کی جھلک دکھائی گئی ہے وہیں زارا نور عباس، محمود اسلم، اسد صدیقی اورعاشر وجاہت کو بھی دکھایا گیا ہے۔

فلم ساز وجاہت رؤف کی اس فلم کی پہلی جھلک رواں ماہ 15 مارچ کو جاری کی گئی تھی جس میں مہوش حیات کے کردار زویا کی تصویر جاری کی گئی تھی۔

’چھلاوا‘ کو رواں برس عیدالفطر پر ریلیز کیا جائے گا۔

مزید پڑھیں: مہوش حیات ‘چھلاوا’ کی زویا

فلم کی کہانی بھی وجاہت رؤف نے لکھی ہے اور اسے ہم فلمز کے بینر تلے ریلیز کیا جائے گا۔