کراچی: پاکستان کرکٹ ٹیم کے سابق فاسٹ باؤلر شعیب اختر نے ویسٹ انڈیز کے خلاف 150 رنز کی شکست کے بعد قومی کرکٹ ٹیم کے کپتان مصباح الحق کو پاکستان کی تاریخ کا سب سے بزدل کپتان قرار دیتے ہوئے کہا کہ وہ صرف اپنے لیے کھیلتے ہیں۔

ایک نجی ٹی وی چینل سے گفتگو کرتے ہوئے شعیب اختر کا کہنا تھا کہ مصباح کی فارم اچھی ہے انہیں دیگر کھلاڑیوں کو بچانا چاہیے اور تیسرے نمبر پر آکر بیٹنگ کرنی چاہیے۔

انہوں نے کہا کہ یہ کیسا کپتان ہے کہ ٹیم کی کیسی بھی حالت ہو اور خود چوتھے، پانچویں نمبر پر آکر بیٹنگ کرے، 50-60 رنز کرے، یہ خودغرضی کی انتہا ہے۔

راولپنڈی ایکسپریس نے کہا کہ 'مصباح صرف اپنی فارم سے خوش ہیں، سمجھ نہیں آرہا کوچ وقار یونس کیا چاہتے ہیں۔ ان کے پاس نہ کوئی گیم پلان نہیں ہے۔'

دوسری جانب سابق کپتان رمیز راجہ بھی مانتے ہیں کہ اب وقت آگیا ہے کہ ورلڈ کپ میں مسلسل ناقص کارکردگی دکھانے والے یونس خان ٹیم سے دستبردار ہوجائیں۔

رمیز نے کہا کہ 'یونس میں آپ کے سامنے ہاتھ جوڑتا ہوں۔ آپ کی پاکستان کرکٹ کے لیے خدمات کے لیے شکریہ لیکن پلیز اس ون ڈے ٹیم کو چھوڑدیں۔'

انہوں نے کہا کہ 'میرے خیال میں یونس کو مینجمنٹ سے کہنا چاہیے کہ انہیں ریسٹ کروایا جائے۔ ہماری فیلڈنگ بھی مذاق بن کر رہ گئی ہے لیکن ہمیں جیت کی راہ پر گامزن ہونے کے لیے صرف ایک میچ جیتنے کی ضرورت ہے۔'

ایک اور سابق کپتان محمد یوسف نے کہا کہ ہماری کرکٹ اس وقت تک بہتر نہیں ہوگی جب کہ ہم بہتر بلے باز نہ پیدا کریں اور مینجمنٹ میں تبدیلیاں نہ لائیں—رائٹرز۔