تیونس : شمالی افریقی ملک تیونس کے ایک ساحلی تفریحی مقام پر ہوٹلوں کے سامنے دہشت گرد حملے میں غیرملکیوں سمیت 27 افراد ہلاک ہوگئے۔

یہ حملہ تیونسی ساحلی مقام سوسہ میں پیش آیا جہاں مسلح افراد نے دو ہوٹلوں پر حملہ کیا۔

تیونس کی وزارت داخلہ کے ترجمان نے بتایا کہ دہشتگرد حملے میں ہلاک ہونے والے بیشتر سیاح ہیں تاہم ابھی ان کی قومیت کے بارے میں واضح طور پر کچھ کہا نہیں جا سکتا۔

انہوں نے بتایا کہ مسلح افراد ہوٹل کے عقب سے اندر آئے اور فائر کھول دیے جس کے نتیجے میں اب تک 27 افراد ہلاک ہو چکے ہیں۔

واقعے کے نتیجے میں درجن بھر زخمی افراد کو بھی ہسپتال میں داخل کرایا گیا ہے۔

حکومتی ترجمان کا کہنا تھا کہ یہ ایک دہشتگرد حملہ ہے جس کے دوران مرحبا نامی ہوٹل کو ہدف بنایا گیا ہے تاہم ان کا کہنا تھا کہ حملہ آور کو ہلاک کردیا گیا تاہم انہوں نے اس امکان کو رد نہیں کیا کہ حملہ آور ایک سے زیادہ بھی ہوسکتے ہیں۔

مقامی افراد نے بتایا کہ دہشت گردوں نے دوپہر کے وقت ساحلی مقام پر حملہ کیا جب ساحل پر سیاحوں کا کافی رش تھا۔

انہوں نے مزید بتایا کہ شروع میں تو ایسا لگا جیسے آتشبازی ہورہی ہے اور لوگ خوشی منارہے ہیں مگر جلد ہی لوگوں میں افراتفری کے آثار دیکھ کر حالات کی سنگینی کا اندازہ ہوا۔

خیال رہے کہ مارچ میں تیونس کے دارالحکومت تیونس شہر میں ایک عجائب گھر پر ہونے والے حملے میں کم از کم 22 افراد مارے گئے تھے۔ہلاک ہونے والوں میں اکثریت غیر ملکی سیاحوں کی تھی اور اس حملے کے بعد سے ملک میں حفاظتی اقدامات سخت کر دیے گئے تھے اور سیکیورٹی ہائی الرٹ پر تھی۔