معروف بولی وڈ اداکار اوم پوری کے انتقال کے بعد دنیا بھر میں ان کے مداح سوشل میڈیا پر اپنے غم کا اظہار کررہے ہیں۔

اداکار اوم پوری کا انتقال دل دورہ پڑنے کے باعث ہوا۔

واضح رہے کہ اوم پوری نے بولی وڈ کے ساتھ ساتھ ہولی وڈ اور پاکستانی فلموں میں بھی کام کیا۔

ان کے انتقال کے بعد جہاں بولی وڈ سے تعلق رکھنے والی شخصیات نے اوم پوری کی یادیں تازہ کی، وہیں پاکستانی فنکار بھی اس غم کی گھڑی میں اداکار کو یاد کرنا نہیں بھولے۔

مزید پڑھیں: بھارتی فلم اسٹار اوم پوری انتقال کرگئے

پاکستانی فلم 'ایکٹر ان لا' اوم پوری کی زندگی کی آخری ریلیز فلم تھی، جس میں انہوں نے فہد مصطفیٰ کے ساتھ اہم کردار ادا کیا۔

اس موقع پر فہد مصطفیٰ کا کہنا تھا کہ 'اوم پوری وہ لیجنڈ ہیں جن کے ساتھ میں نے کام کیا، ان کی فطرت نہایت پیار کرنے والے شخص کی تھی جس نے سرحد پار بھی لوگوں کے دلوں میں جگہ بنائی'۔

اداکارہ میشا شفیع نے بھی اوم پوری کے ساتھ گزاری یادیں تازہ کی، انہوں نے کہا کہ 'یقین نہیں آرہا وہ چلے گئے، میرا آپ کا بےحد شکریہ جو آپ نے مجھے سلور اسکرین کے اس لیجنڈ کے ساتھ کام کرنے کا موقع دیا'۔

اداکار رض احمد نے بھی اوم پوری کو اپنا رول ماڈل کہا۔

اداکار ہمایوں سعید نے بھی اپنے دکھ کا اظہار کرتے ہوئے کہا کہ 'ایک بہترین اداکار اور باہمت انسان، اوم پوری نے مشکل حالات میں امن اور ہم آہنگی کے لیے مسلسل کام کیا'۔

ہدایت کار سرمد کھوسٹ کے پاس اپنے دکھ کا اظہار کرنے کے لیے الفاظ ہی موجود نہیں تھے۔

ماہرہ خان کا کہنا تھا کہ 'دنیا نے اپنا بہترین فنکار کھو دیا، اوم پوری سچ میں انڈین سینما کے بہترین اداکار تھے'۔

اداکار یاسر حسین نے انسٹاگرام پر اوم پوری کے ساتھ تصاویر شیئر کی۔

ماورا حسین نے کہا کہ 'اوم پوری سر، آپ کو ہمیشہ دونوں ممالک کے درمیان امن اور پیار کو فروغ دینے والا سمجھا جائے گا'۔

اداکارہ صنم سعید نے اپنے دکھ کا اظہار کرتے ہوئے کہا کہ 'بہت جلد، اوم پوری جیسے لیجنڈ کا کھونا ایک اور بڑا صدمہ، خدا ان کے خاندان کو ہمت دے'۔