امریکی صدر ڈونلڈ ٹرمپ نے شمالی کوریا کے سپریم لیڈر کم جونگ ان کو خط لکھ کر کہا ہے کہ وہ اگلے ماہ سنگاپور میں ہونے والی جوہری سربراہی کانفرنس کو منسوخ کر رہے ہیں۔

فرانسیسی خبر رساں ادارے اے ایف پی کی رپورٹ کے مطابق ڈونلڈ ٹرمپ نے خط میں تاریخی اجلاس کے منسوخ ہونے کی وجہ شمالی کوریا کا ’غصہ‘ اور ’دشمنیت‘ کو ٹھہرایا۔

خیال رہے کہ ڈونلڈ ٹرمپ اور کم جونگ ان کے درمیان شمالی کوریا کے جوہری ہتھیار بنانے کے عزائم ترک کرنے کے حوالے سے اجلاس 12 جون کو ہونا تھا تاہم دونوں ممالک کی جانب سے تلخ کلامی اور دھمکیوں کے تبادلے کے بعد اس اجلاس کے انعقاد پر خدشات بڑھنے لگے تھے۔

مزید پڑھیں: جنوبی کوریا کے ’ناواقف اور نااہل‘ حکام سے بات چیت ممکن نہیں، شمالی کوریا

شمالی کوریا نے گزشتہ روز امریکی نائب صدر مائیک پینس کو ’جاہل اور بے وقوف‘ کہا تھا جس کے بعد ڈونلڈ ٹرمپ کا یہ خط سامنے آیا۔

وائٹ ہاؤس کی جانب سے جاری کیے گئے ڈونلڈ ٹرمپ کے کم جونگ ان کو لکھے گئے خط میں کہا گیا کہ ’افسوس کے ساتھ، آپ کے حالیہ بیانوں میں انتہائی غصہ اور دشمنیت کے باعث، مجھے یہ غیر مناسب لگتا ہے کہ ایسے موقع پر ہم طویل عرصے سے منصوبہ بندی کیے جانے والی ملاقات کا انعقاد کریں‘۔

ڈانلڈ ٹرمپ کا کہنا تھا کہ ’تاہم اس خط سے بتایا جاتا ہے کہ دونوں اطراف کی بہتری کے لیے سنگاپور سمٹ کا انعقاد نہیں ہوگا‘۔

ڈونلڈ ٹرمپ نے امریکی جوہری ہتھیار کی تشہیر کرتے ہوئے کہا کہ ’آپ جوہری صلاحیتوں کی بات کرتے ہیں لیکن ہماری جوہری صلاحیت اتنی زیادہ اور طاقتور ہے کہ میں خدا سے دعا کرتا ہوں کہ اس کا کبھی استعمال نہ کرنا پڑے‘۔

امریکی صدر کے خط میں مستقبل میں اجلاس کے حوالے سے جگہ دی گئی اور کہا گیا کہ ہم آپ کے وقت، صبر اور مذاکرات و بحث کے لیے آپ کی جانب سے کی گئی کوششوں کی قدر کرتے ہیں‘۔

یہ بھی پڑھیں: شمالی کوریا کے رہنما سے ملاقات، امریکا اور جنوبی کوریا کی مشاورت

ڈونلڈ ٹرمپ کا کہنا تھا کہ ’آپ کے اور میرے درمیان ایک بہترین رابطہ قائم ہورہا تھا اور آخر میں صرف یہ رابطہ ہی اہمیت رکھتا ہے، اگر آپ اس انتہائی اہم سمٹ کے حوالے سے اپنا موقف تبدیل کرتے ہیں تو بلا جھجک مجھے فون کریں یا خط لکھیں‘۔

ان کا کہنا تھا کہ دنیا، اور خصوصی طور پر شمالی کوریا نے دیر پا امن اور عظیم خوشحالی کا موقع گنوا دیا ہے اور یہ موقع گنوانا تاریخ کا انتہائی افسوسناک عمل ہے۔

واضح رہے کہ یہ فیصلہ اس وقت سامنے آیا جب شمالی کوریا نے سنگاپور میں خیر سگالی کے طور پر ’پوری طرح سے‘ اپنی جوہری تجربات کی سائٹ کو تباہ کردیا تھا۔