نک جونس نے خود سے 10 سال بڑی پریانکا سے محبت کا سبب بتادیا

اپ ڈیٹ 19 جولائ 2018

ای میل

—فائل فوٹو: این ڈی ٹی وی
—فائل فوٹو: این ڈی ٹی وی

امریکی گلوکار 25 سال نک جونس اور 35 سالہ بولی وڈ اداکارہ پریانکا چوپڑا کی محبت کی چہ مگوئیاں گزشتہ چند ماہ سے جاری ہیں۔

ان دونوں کے درمیان محبت کی خبریں گزشتہ برس کانز فلمی میلے کے ایونٹ میٹ گالا میں پہلی بار ایک ساتھ شرکت کے بعد آنا شروع ہوئیں۔

رواں برس جون میں ان دونوں کو پہلی بار عوامی مقامات میں دیکھا گیا، جس کے بعد ان دونوں کے درمیان جلد منگنی اور شادی کی خبریں بھی گردش کرنے لگیں۔

گزشتہ ماہ جون میں پریانکا چوپڑا نے امریکا میں نک جونس کے کزن کی شادی میں شرکت بھی کی تھی، جس کے بعد اسی ماہ کے آخر میں امریکی گلوکار پہلی بار بھارت بھی آئے تھے۔

بھارتی دورے کے دوران نک جونس نے پریانکا چوپڑا کی والدہ اور بھائی سے ملاقات بھی کی، جس کے بعد دونوں امریکا چلے گئے۔

جہاں ان دونوں کی محبت کی خبریں امریکی و بھارتی میڈیا پر گردش کرتی رہیں، وہیں ان دونوں کی عمر میں 10 سال کے فرق پر باتیں ہونے لگیں۔

یہ بھی پڑھیں: پریانکا چوپڑا نے امریکی گلوکار سے تعلقات پر خاموشی توڑ دی

کئی لوگوں نے ان کی عمر میں ایک دہائی کے فرق کے باوجود دونوں میں محبت ہوجانے پر حیرت کا اظہار بھی کیا، تاہم دونوں اپنی محبت اور عمر کے حوالے سے تاحال کوئی واضح بیان نہیں دیا۔

—فوٹو: انسٹاگرام
—فوٹو: انسٹاگرام

لیکن اب نک جونس کی ایک پرانی ویڈیو انٹرنیٹ پر وائرل ہو رہی ہے، جس میں وہ یہ بتاتے نظر آ رہے ہیں کہ انہوں نے آج تک خود سے بڑی عمر کی کتنی خواتین سے محبت کی اور وہ کیوں بڑی عمر کی خواتین کو پسند کرتے ہیں۔

انڈیا ٹوڈے کی رپورٹ کے مطابق معروف امریکی ٹی وی براوو کے ‘اینڈی کوہن شو‘ میں بات کرتے ہوئے 25 سالہ گلوکار نے انکشاف کیا کہ انہوں نے آج تک خود سے بڑی عمر کی کتنی خواتین سے ملاقاتیں کیں۔

وائرل ہونے والی ویڈیو میں دیکھا جاسکتا ہے کہ ٹی وی شو میں ایک خاتون فون کرکے نک جونس سے سوال کرتی ہیں کہ آج تک وہ کتنی بڑی عمر کی خواتین سے مل چکے ہیں۔

مزید پڑھیں: پریانکا چوپڑا اور امریکی گلوکار کے درمیان محبت

ویڈیو میں دیکھا جاسکتا ہے کہ نک جونس پہلے تو خاتون اور میزبان کے سوال پر ہنستے ہیں، بعد ازاں وہ جواب میں پہلے 30 سال بعد میں 33 سال اور آخر میں 35 سال کہتے ہیں۔

نک جونس کے مطابق انہوں نے خود سے بڑی عمر کی خواتین سے ہی محبت کی ہے۔

وہ وضاحت کرتے ہیں کہ وہ اس لیے بڑی عمر کی خواتین کو پسند کرتے ہیں، کیوں کہ وہ جانتی ہیں کہ وہ کیا چاہتے ہیں‘۔

یہ پروگرام رواں ماہ جولائی کے آغاز میں نشر کیا گیا تھا، جس کی ویڈیو اب وائرل ہو رہی ہے۔

بھارتی و امریکی میڈیا میں چہ مگوئیاں جاری ہیں کہ نک جونس کا 35 سال کا اشارہ پریانکا چوپڑا کی جانب تھا۔

تاہم تاحال اس پرانی ویڈیو پر نک جونس نے کوئی وضاحت نہیں کی اور نہ ہی پریانکا چوپڑا نے اس حوالے سے کوئی بات کی ہے۔

دوسری جانب یہ بھی اطلاعات ہیں کہ دونوں رواں ماہ کے آخر یا آئندہ ماہ تک منگنی کرلیں گے، جس کے بعد آئندہ 2 سال کے اندر دونوں کی شادی ہونے کا بھی امکان ہے۔