سام سنگ نے اپنا سب سے سستا اسمارٹ فون گلیکسی جے 2 کور متعارف کرادیا ہے جو اس جنوبی کورین کمپنی کا گوگل کے اینڈرائیڈ گو پروگرام کی پہلی ڈیوائس ہے۔

اینڈرائیڈ گو پروگرام میں ایسے فونز کو شامل کیا جاتا ہے جس میں نئے آپریٹنگ سسٹم کا لائٹ ورژن دیا جاتا ہے جبکہ گوگل ایپس بھی لائٹ ورژن کی ہوتی ہیں۔

مزید پڑھیں : سام سنگ کا ایسا اسمارٹ فون پہلے کبھی دیکھنے میں نہیں آیا

تاہم سام سنگ کا یہ نیا فون اینڈرائیڈ اوریو 8.1 کے ساتھ ہوگا اور فی الحال اینڈرائیڈ پائی کا ورژن نہیں دیا جارہا ہے، جبکہ سام سنگ نے اس میں اپنے یو آئی کو بھی آپریٹنگ سسٹم کا حصہ بنایا ہے۔

اس فون میں 5 انچ کا ایل سی ڈی ڈسپلے دیا گیا ہے جبکہ ایکسینوس 7570 پراسیسر، 2600 ایم اے ایچ بیٹری، ایک جی بی ریم اور 8 جی بی اسٹوریج ہوگی، تاہم اس میں میموری کارڈ سے اضافہ کیا جاسکتا ہے۔

یہ بھی پڑھیں : اصلی سام سنگ فون کی شناخت کیسے کریں؟

اس کے بیک پر 8 میگا پکسل کیمرہ ایل ای ڈی فلیش کے ساتھ دیا گیا ہے جبکہ فرنٹ پر 5 میگا پکسل کیمرہ ہے۔

کمپنی کی جانب سے جاری بیان کے مطابق گلیکسی جے 2 کور ایک مکمل اسمارٹ فون کا تجربہ فراہم کرے گا اور اس میں چند ایسے اہم فیچرز ہیں جو ہائی اینڈ ڈیوائسز کا حصہ ہوتے ہیں، خصوصاً یہ پہلی بار اسمارٹ فون لینے والوں کے لیے زیادہ اچھا ثابت ہوگا۔

یہ فون سب سے پہلے بھارت اور ملائیشیا میں فروخت کے لیے پیش کیا جائے گا اور مستقبل قریب میں دیگر مارکیٹوں میں بھی دستیاب ہوگا۔

اس کی قیمت 100 ڈالرز سے کم ہوگی یعنی پاکستان میں یہ 10 سے 12 ہزار روپے کے درمیان فروخت کے لیے پیش ہوسکتا ہے۔