بھارتی سینما کے شومین راج کپور کی اہلیہ کرشنا راج کپور 87 سال کی عمر میں انتقال کرگئیں۔

وہ بولی وڈ کے معروف اداکار رندھیر کپور اور رشی کپور کی والدہ تھیں۔

ان کے بچوں میں راجیو کپور، ریتو کپور نندا اور ریما جین بھی شامل ہیں۔

مزید پڑھیں: راج کپورعظیم ترین شومین قرار

کرشنا راج کپور اپنے شوپر راج کپور کے 1988 میں انتقال کے بعد سے کپور خاندان کا سب سے اہم حصہ تھیں۔

یاد رہے کہ کپور خاندان کو عام طور پر "ہندوستانی سینما کی فرسٹ فیملی" کے نام سے بھی جانا جاتا ہے۔

کرشنا راج کپور کے پوتے رنبیر کپور، پوتی کرینہ کپور اور کرشمہ کپور نے بھی ہندی سینما میں خوب نام کمایا۔

والدہ کے انتقال پر بیٹے رندھیر کپور کا میڈیا سے بات کرتے ہوئے کہنا تھا کہ ’میری والدہ کا آج صبح (یکم اکتوبر) 5 بجے حرکت قلب بند ہونے کے باعث انتقال ہوا، ضعیف العمری بھی ایک وجہ تھی، ہم سب ان کے انتقال پر بےحد غم زدہ ہیں‘۔

جبکہ ان کی پوتی اور رشی کپور کی بیٹی ردھیما کپور سہانی نے بھی انسٹاگرام پر اپنی دادی کے ہمراہ تصویر شیئر کی۔

ان کے انتقال پر بولی وڈ سے تعلق رکھنے والی کئی نامور شخصیات نے اپنے دکھ کا اظہار کیا۔