کراچی کے حالات و واقعات اور مصروف زندگی پر اگرچہ متعدد فلمیں بنائی جا چکی ہیں، تاہم حالیہ سالوں میں ریلیز ہونے والی کامیڈی ایکشن فلم ’نامعلوم افراد‘ نے پرانی فلموں کے ریکارڈ توڑ دیے تھے۔

’نا معلوم افراد‘ کی کامیابی کے بعد اگرچہ اس کا سیکوئل بھی بنایا گیا، تاہم سیکوئل میں کراچی کو کم دکھایا گیا، اسی طرح حالیہ سالوں میں دیگر فلمیں بھی کراچی میں بنائی گئیں، تاہم کوئی فلم شائقین کی توجہ حاصل کرنے میں ناکام رہی۔

اور اب کراچی کی صورتحال کے گرد گھومتی کہانی پر بنائی گئی ایک اور ایکشن کامیڈی فلم ’لال کبوتر‘ کا پہلا ٹیزر جاری کردیا گیا، جسے دیکھ کر اندازہ ہوتا ہےکہ فلم کو دیکھ کر لوگ ایک بار پھر کراچی کے سحر میں ڈوب جائیں گے۔

فلم ساز کمال خان کی ’لال کبوتر‘ کے ایک منٹ دورانیے کے ٹیزر میں کراچی کے مناظر کو دکھایا گیا ہے، تاہم ٹیزر میں صرف ایک ہی ڈائیلاگ دے کر کمال کیا گیا۔

ٹیزر میں اگرچہ اداکارہ منشا پاشا اور احمد علی اکبر کو بھی دکھایا گیا ہے، تاہم ٹیزر میں ڈائلاگس کے بجائے مناظر کو دے کر شائقین کے تجسس کو بڑھایا گیا ہے۔

ٹیزر کو دیکھ کر اندازہ ہوتا ہے کہ فلم میں نہ صرف مار دھاڑ اور کامیڈی ہوگی بلکہ ایکشن اور بھرم بازیاں بھی دیکھنے کو ملیں گی۔

ٹیزر کے آغاز میں ہی منشا پاشا کو پستول کی گولی سے کھیلتے ہوئے دکھایا گیا ہے، جب کہ ٹیزر میں ایک پولیس والے کو ٹھنڈی قلفی کو مزے سے کھاتے ہوئے دکھایا گیا ہے۔

ٹیزر میں کراچی کی پرانی اور خستہ عمارتوں اور سڑکوں کو دکھانے سمیت دیگر کرداروں کو بھی مسائل میں الجھتے اور انہیں حل کرتے دکھایا گیا ہے۔

ٹیزر میں اگرچہ فلم کو ریلیز کرنے کی تاریخ کا اعلان نہیں کیا گیا، تاہم بتایا گیا کہ فلم کو آئندہ برس ہی ریلیز کیا جائے گا۔