ہولی وڈ کے کامیاب ہدایت کار کرسٹوفر نولن نے اپنی نئی فلم بنانے کا اعلان کردیا جس میں کوئی اور نہیں بلکہ بولی وڈ اداکارہ ڈمپل کپاڈیا کو ایک اہم کردار کے لیے کاسٹ کرلیا گیا۔

کرسٹوفر نولن کی نئی فلم کا نام 'ٹینٹ' ہے جس کی کہانی تھرلر ہوگی۔

اس فلم کی کاسٹ میں جون ڈیوڈ واشنگٹن، روبرٹ پیٹنسن، مشیل کین جیسے اداکار موجود ہیں۔

ہولی وڈ رپورٹر کی خبر کے مطابق فلم 'ٹینٹ' کی کہانی ایکشن سے بھرپور ہے، جس کی شوٹنگ 7 ممالک میں کی جائے گی۔

بولی وڈ تجزیہ کار راجیو مسند نے بھی اداکارہ کو کرسٹوفر نولن کی فلم ملنے پر مبارکباد دی۔

یاد رہے کہ ڈمپل کپاڈیا کی یہ پہلی ہولی وڈ فلم نہیں، اس سے قبل وہ 2002 میں امریکی پروڈکشن میں بننے والی فلم 'لیلا' میں بھی کام کرچکی ہیں۔

فلم میں ڈمپل کپاڈیا کو یہ کردار ملنے کے حوالے سے اداکارہ کے مینجر کا کہنا تھا کہ ہولی وڈ ہدایت کار کو ڈمپل کپاڈیا کا کام دکھایا گیا، جس کے بعد انہیں اداکارہ کا ٹیلنٹ پسند آیا۔

انہوں نے مزید بتایا کہ 'ڈمپل نے کبھی فلم کے لیے اوڈیشن نہیں دیا، کس کے بعد مجھے انہیں سمجھانا پڑا کہ وہ اپنا اوڈیشن ٹیپ تیار کریں تاکہ اسے کرسٹوفر کو بھیجا جاسکے، تاہم انہوں نے ایسا نہیں کیا، جس کے بعد کرسٹوفر نے ان کے ماضی میں کیے کام کو ہی دیکھا اور انہیں کاسٹ کرلیا'۔

ان کی یہ نئی ہولی وڈ فلم 'ٹینٹ' سال 2020 میں 17 جولائی کو سینما گھروں میں ریلیز ہوگی۔