بوئنگ اور ہورشے اڑنے والی گاڑی بنانے کے لیے تیار

اپ ڈیٹ 11 اکتوبر 2019

ای میل

— فوٹو بشکریہ بوئنگ
— فوٹو بشکریہ بوئنگ

پہلے زمانے کی جادوئی کہانیوں میں شہزادوں کی سواریاں اڑن قالین ہوا کرتے تھے، لیکن اب اس کی جدید قسم اڑن گاڑیوں کی شکل میں بھی سامنے آنے والی ہے۔

ویسے تو متعدد کمپنیاں اس طرح کی گاڑیوں کی تیاری پر کام کررہی ہیں مگر جب طیارے بنانے کے حوالے سے مشہور کمپنی بوئنگ اور گاڑیاں تیار کرنے والی کمپنی پورشے ایک ساتھ مل کر یہ کام کریں تو کامیابی یقینی محسوس ہوتی ہے۔

بوئنگ اور پورشے نے مل کر ایسی گاڑیاں تیار کرنے کا اعلان کیا ہے جو کسی ہیلی کاپٹر کی طرح اڑ بھی سکیں گی ۔

مزید پڑھیں : گوگل کی اڑن گاڑی پرواز بھرنے کے لیے تیار

درحقیقت یہ اڑنے والی گاڑی امیر ترین افراد کے لیے تیار کی جائے گی تاکہ انہیں کبھی ٹریفک جام کے مسئلے کا سامنا نہ ہو۔

دونوں کمپنیوں کی جانب سے جاری بیان کے مطابق ایک ایسی بین الاقوامی ٹیم تیار کی جائے گی جو شہری فضائی سفر کے مختلف پہلوﺅں کو مدنظر رکھ کر گاڑیوں کی تیاری کو ممکن بنایا جائے گا۔

کمپنیوں نے ان گاڑیوں کے لیے پریمیئم کا لفظ استعمال کرکے عندیہ دیا ہے کہ یہ اڑن گاڑی عام لوگوں کے لیے نہیں ہوگی۔

ویسے بھی جب پورشے کا نام جڑ جائے تو یہ کوئی حیران کن بات نہیں اور یہ گاڑی روایتی ایندھن کی بجائے بجلی کی مدد سے اڑائی جائے گی۔

ویسے گوگل کے بانی لیری پیج بھی اس طرح کی گاڑی کی تیاری پر کام کررہے ہیں جس کے کانسیپٹ ماڈل بھی سامنے آچکے ہیں۔

گزشتہ سال ایک ماڈل کورا کو متعارف کرایا گیا تھا جو کہ ایک اڑنے والی ٹیکسی کے طور پر استعمال کی جائے گی۔

اس میں خودکار پرواز کی صلاحیت رکھنے والے سافٹ وئیر کو استعمال کیا جائے گا، جبکہ اس میں لگائے جانے والے 12 پنکھے عمودی ٹیک آف اور لینڈنگ میں مدد دیں گے، بالکل کسی ہیلی کاپٹر کی طرح، تو رن وے کی ضرورت بھی نہیں ہوگی۔

اڑان بھرنے کے بعد ایک سنگل پروپلر کورا کو 500 سے 3 ہزار فٹ کی بلندی پر 110 میل فی گھنٹہ کی رفتار سے پرواز سے مدد دے گا۔

کمپنی کے مطابق یہ گاڑی یا طیارہ 3 کمپیوٹرز سے لیس ہوگا جو اسے راستہ تلاش کرنے میں مدد دیں گے۔