پاکستان کو 150 رنز سے بدترین شکست
کرائسٹ چرچ: ویسٹ انڈیز نے ورلڈ کپ کے اہم میچ میں پاکستان کو 150 رنز کے بھاری مارجن سے شکست دے کر ایونٹ میں پہلی کامیابی سمیٹ لی ہے۔
پاکستانی کپتان مصباح الحق نے ٹاس جیت کر پہلے بلے بازی کا فیصلہ کیا جو ابتدا میں درست ثابت ہوا اور 28 رنز پر دونوں ویسٹ انڈین اوپنرز پویلین لوٹ چکے تھے۔
میچ کا مکمل احوال جانے کے لیے یہاں کلک کریں
لیکن اس کے بعد ویسٹ انڈین بلے بازوں نے شراکتیں قائم کیں اور اسکور بڑھانے کا سلسلہ جاری رکھا، ڈیرن براوو 49، مارلن سیمیولز 38، دنیش رامدین 51، لینڈل سمنز 50، ڈیرن سیمی 30 جبکہ آندرے رسل نے 13 گیندوں پر 42 رنز کی جارحانہ اننگ کھیلی۔
ویسٹ انڈیز کو بڑا مجموعہ بنانے میں پاکستانی فیلڈرز کی بھرپور مدد کا ساتھ رہا جنہوں نے پانچ کیچ ڈراپ کیے۔
جواب میں پاکستانی کی بیٹنگ کا آغاز ایک بھیانک خواب اور ایک روزہ کرکٹ کی تاریخ کا بدترین ریکارڈ تھا۔
صرف ایک رن پر چار پاکستای بلے باز پویلین لوٹ چکے تھے جبکہ 25 کے اسکور تک پہنچتے پہنچتے پانچ کھلاڑی آؤٹ ہو گئے۔
اس موقع پر صہیب مقصود اور عمر اکمل نے 80 رنز کی شراکت قائم کی لیکن دونوں کھلاڑی بالترتیب 50 اور 59 رنز بنانے کے بعد وکٹ پر سیٹ ہو کر آؤٹ ہوئے۔
آفریدی بھی کوئی کرشمہ نہیں دکھا سکے اور 28 رنز بنا کر پویلین لوٹ گئے اور پوری پاکستانی ٹیم 160 رنز بنا کر آؤٹ ہو گئی۔
پاکستانی بیٹنگ لائن ی ابتری کا اندازہ اس بات سے لگایا جا سکتا ہے کہ آٹھ کھلاڑی ڈبل فیگر میں بھی داخل نہ ہو سکے۔
ویسٹ انڈیز نے میچ میں 150 رنز کے بھاری مارجن سے کامیابی حاصل کی جو ورلڈ کپ میں رنز کے اعتبار سے پاکستان کی سب سے بڑی شکست ہے۔
پاکستانی ٹیم ایونٹ میں اپنا اگلا میچ اتوار یکم مارچ کو زمبابوے کے خلاف کھیلے گی۔
تبصرے (1) بند ہیں