یہ جوانی ہے دیوانی، زندگی نہ ملے گی دوبارہ اور ربن جیسی فلموں میں جلوے دکھانے والی 34 سالہ اداکارہ کالکی کوچلین جلد ہی پہلی باررنویر سنگھ اور عالیہ بھٹ کے ساتھ ایکشن میں دکھائی دیں گی۔

تینوں اداکار فلم ساز زویا اختر کی فلم ’گلی بوائے‘ میں جلوہ گر ہوں گے، جس میں کالکی کوچلین ایک گلوکارہ کے طور پر نظر آئیں گی۔

’گلی بوائے‘ میں اگرچہ مرکزی کردار رنویر سنگھ اور عالیہ بھٹ کا ہوگا، تاہم کالکی کوچلین کا کردار بھی اہم ہوگا۔

احمد آباد مرر کے مطابق 34 سالہ کالکی کوچلن ’گلی بوائے‘ میں رنویر سنگھ کی طرح ایک گلوکار کے روپ میں نظر آئیں گی۔

یہ بھی پڑھیں: کالکی کوچلین پاکستانی فلم کا حصہ ہوں گی

فلم میں کالکی کوچلن اور رنویر سنگھ ممبی کی گلیوں میں گانے گاکر شہرت حاصل کرنے والے نوجوان گلوکاروں ووین ڈوائن اور نائزے کا کردار ادا کریں گے۔

فلم کی کہانی سچے واقعے پر مبنی ہوگی، جس کی شوٹنگ کا آغاز آئندہ ماہ شروع کیے جانے کا امکان ہے۔

خیال رہے کہ پہلی بار کالکی کوچلین، رنویر سنگھ اور عالیہ بھٹ ایک ساتھ کام کرتے نظر آئیں گے۔

جب کہ زویا اختر کے ساتھ کالکی کوچلین دوسری بار کام کرتی نظر آئیں گی، اس سے قبل وہ ان کی 2011 کی فلم ’زندگی نہ ملے گی دوبارہ‘ میں ہریتھک روشن، کترینہ کیف اور فرحان اختر کے ساتھ نظر آئیں تھیں۔

مزید پڑھیں: رنویر اور عالیہ کی دھوم

کالکی کوچلین کو ’یہ جوانی ہے دیوانی، ربن، مارگریٹا ود اسٹرا، ترشنا، ہیپی اینڈنگ، فریڈم میٹرس، نیکڈ، جیا اور جیا‘ سمیت مختلف فلموں اور ڈاکیومینٹریز میں منفرد اداکاری کرنے کے باعث کئی ایوارڈ بھی مل چکے ہیں۔

انہوں نے فلمی کیریئر کا آغاز 2009 میں ’ڈیو ڈی‘ فلم سے کیا، انہوں نے اسی فلم میں بیسٹ سپورٹنگ اداکارہ کا فلم فیئر ایوارڈ بھی حاصل کیا۔

کالکی کوچلین نیشنل، فلم فیئر اور اسکرین ایوارڈ سمیت متعدد ایوارڈ اپنے نام کرچکی ہیں۔