نیند کا مخصوص وقت صحت کے لیے اہم کیوں؟

24 ستمبر 2018
یہ بات ایک نئی طبی تحقیق میں سامنے آئی— شٹر اسٹاک فوٹو
یہ بات ایک نئی طبی تحقیق میں سامنے آئی— شٹر اسٹاک فوٹو

اگر آپ رات بھر 7 سے 8 گھنٹے سوتے ہیں تو بھی ضروری نہیں کہ اس سے صحت بہتر ہو کیونکہ اس کے لیے مخصوص وقت پر بستر پر جانا ضروری ہے۔

یہ بات ایک نئی طبی تحقیق میں سامنے آئی۔

ڈیوک یونیورسٹی کی تحقیق میں بتایا گیا کہ ویسے تو رات بھر 7 گھنٹے کی نیند کا ہدف بہت اہمیت رکھتا ہے مگر اس کے فوائد کے حصول کے لیے ضروری ہے کہ سونے کا ایک وقت طے کرلیا جائے۔

مزید پڑھیں : نیند کی کمی سے ہونے والے 16 نقصانات

تحقیق کے مطابق بیشتر افراد کو لگتا ہے کہ سونے کا مخصوص وقت بچوں کے لیے ہوتا ہے اور بلوغت کے بعد کسی بھی وقت سوجانے میں کوئی برائی نہیں۔

مگر اس نئی تحقیق میں بتایا گیا کہ جن لوگوں کی نیند کا کوئی وقت طے نہیں ہوتا، وہ موٹاپے کے زیادہ شکار، کم صحت مند، بلڈ شوگر اور ہائی بلڈ پریشر کے شکار ہوسکتے ہیں۔

محققین کا کہنا تھا کہ یہ واضح نہیں آخر نیند کا کوئی وقت طے نہ ہونا اور ان عوارض کے درمیان تعلق کیا ہے، تاہم ایسا ہوتا ضرور ہے۔

تحقیق کے دوران 2 ہزار کے قریب بالغ افراد کی نیند کی عادات کا تجزیہ کیا گیا اور دیکھا گیا کہ وہ رات کو کتنے گھنٹے سوتے ہیں اور ان کا کوئی شیڈول ہے یا نہیں۔

نتائج سے معلوم ہوا کہ جن لوگوں کے سونے کا کوئی وقت نہیں،وہ چاہے 7 گھنٹے سونے کے عادی ہی کیوں نہ ہو، مگر ان میں مختلف امراض کا خطرہ بڑھ جاتا ہے۔

یہ بھی پڑھیں : وہ غذائیں جو جلد اور اچھی نیند میں مدد دیں

محققین نے دریافت کیا کہ فشار خون کے شکار افراد زیادہ دیر تک سونے کے عادی ہوتے ہیں جبکہ موٹاپے کے شکار لوگ رات گئے تک جاگتے رہتے ہیں۔

انہوں نے بتایا کہ کسی فرد کی نیند کے نظام الاوقات سے اس کے دل اور میٹابولک امراض کے خطرے میں جانا جاسکتا ہے۔

اس تحقیق کے نتائج طبی جریدے جرنل سائنٹیفک رپورٹس میں شائع ہوئے۔

ضرور پڑھیں

تبصرے (1) بند ہیں

HonorBright Sep 24, 2018 09:41am
O Science, you keep on making it difficult for us to live easily.. :(