ایپل کے مہنگے ترین آئی فون ایکس ایس (10s) اور ایکس ایس میکس (10s میکس) گزشتہ ہفتے مختلف ممالک میں فروخت کے لیے پیش کردیئے گئے تھے اور لگتا ہے کہ ڈیوائسز کی فروخت کو حریفوں کی 'بری نظر' لگ گئی ہے۔

درحقیقت فونز کی دستیابی کے چند دن بعد ہی لوگوں نے ان میں مسائل کی شکایت شروع کردی ہے۔

مزید پڑھیں : ایپل کے اب تک کے مہنگے ترین آئی فون فروخت کے لیے پیش

ایپل سپورٹ فورم، میک ریورمرز فورمز اور ریڈیٹ میں متعدد امریکی صارفین نے نئے آئی فونز میں سیلولر اور وائی فائی ریسپشن ناقص ہونے اور پرانے ماڈلز سے زیادہ سست ہونے کی شکایت کی ہے۔

اور یہ مسائل امریکا بھر میں سامنے آئے ہیں جو کہ اس لیے حیران کن ہے کیونکہ ایپل نے دونوں آئی فونز میں وائی فائی اور ایل ٹی ای کی ڈیٹا اسپیڈ کو گزشتہ سال کے آئی فون ایکس (10) کے مقابلے میں نمایاں حد تک بہتر کیا تھا۔

اس مقصد کے لیے فون کے نچلے حصے میں نئی انٹینا لائن بھی دی گئی ہے جس کا مقصد ڈیٹا ریسیپشن کو مدد فراہم کرنا ہے۔

یہ بھی پڑھیں : ایپل کی تاریخ کا سب سے بڑا اور مہنگا ترین آئی فون

اس سے قبل آئی فون سکس کو بھی فروخت کے لیے پیش کیے جانے کے بعد 'بینڈگیٹ' نامی مسئلے کا سامنا ہوا تھا جس میں لوگوں نے شکایت کی تھی کہ فونز جیب میں رکھنے پر مڑ یا خم کھا جاتے ہیں۔

اس موقع پر سام سنگ، ایل جی اور دیگر کمپنیوں نے سوشل میڈیا پر ایپل کا کافی مذاق بھی اڑایا تھا۔

ابھی اس نئے مسئلے پر صارفین سافٹ وئیر اپ ڈیٹ کے منتظر ہیں تاکہ ریسیپشن کا مسئلہ حل ہوسکے تاہم ایپل نے فی الحال اس معاملے پر کوئی بیان جاری نہیں کیا ہے۔

ضرور پڑھیں

تبصرے (0) بند ہیں