سیلفی کے شوقین افراد کے لیے دستیاب 5 بہترین اسمارٹ فونز

10 فروری 2019

ای میل

مارکیٹ میں دستیاب کونسے فونز سیلفی کا شوق پورا کرنے کے لیے بہترین ہیں— شٹر اسٹاک فوٹو
مارکیٹ میں دستیاب کونسے فونز سیلفی کا شوق پورا کرنے کے لیے بہترین ہیں— شٹر اسٹاک فوٹو

بیشتر افراد ایک اسمارٹ فون خریدتے ہوئے کیمرے کے معیار کو بھی مدنظر رکھتے ہیں خصوصاً سیلفی کیمرا توجہ کا زیادہ مرکز ہوتا ہے۔

مگر اس وقت مارکیٹ میں دستیاب کونسے فونز سیلفی کا شوق پورا کرنے کے لیے بہترین ہیں؟

اس حوالے سے ہر ایک کا معیار الگ ہوسکتا ہے مگر ایک کمپنی ڈی ایکس اومارک نے فیصلہ کیا کہ صارفین کی مدد کی جائے۔

یہ کمپنی بنیادی طور پر موبائل فوٹوگرافی کے حوالے سے جانی جاتی ہے اور اس نے 2019 کے لیے بہترین سیلفی کیمرا فونز کی فہرست مرتب کی ہے۔

اس فہرست میں مختلف عناصر کو مدنظر رکھ کر اسمارٹ فونز کو اسکور دیئے گئے اور درج ذیل میں ٹاپ 5 فونز کو دیکھ سکتے ہیں۔

5۔ گوگل پکسل 2 (80 پوائنٹس)

فوٹو بشکریہ گوگل
فوٹو بشکریہ گوگل

گوگل پکسل 2 کو 2017 میں متعارف کرایا گیا تھا جس کے فرنٹ پر 8 میگا پکسل ریزولوشن والا کیمرہ دیا گیا ہے جس میں 1/3.2 انچ سنسر اور 1.14µm پکسل سائز دیا گیا ہے۔ کمپنی کے مطابق اس میں ان ڈور اور کم روشنی میں وائٹ بیلنس تو کافی بہتر ہے مگر باہر کے ماحول میں اس کی تصاویر میں گلابی جھلک سی نظر آنے لگتی ہے۔ کمپنی کا مزید کہنا تھا کہ پکسل 2 ان افراد کے لیے زیادہ بہتر آپشن ہے جو اپنے ساتھ سیلفی میں پس منظر کو بھی زیادہ دکھانا پسند کرتے ہوں۔

4۔ سام سنگ گلیکسی ایس 9 پلس (81 پوائنٹس)

اے ایف پی فائل فوٹو
اے ایف پی فائل فوٹو

سام سنگ کے اس فلیگ شپ فون کے فرنٹ کیمرے پر کافی توجہ دی گئی تھی اور کمپنی کی کوشش تھی کہ کچھ فاصلے سے لی جانے والی سیلفی زیادہ بہتر ہو، اس کے فاسٹ ایف 1.7 آپرچر سے گزر کر آنے والی روشنی اسے گروپ سیلفی کے لیے بہترین بناتی ہے بلکہ سیلفی اسٹک کی ضرورت بھی نہیں رہتی۔

3۔ آئی فون ایکس ایس میکس (81 پوائنٹس)

فوٹو بشکریہ ایپل
فوٹو بشکریہ ایپل

گزشتہ سال ستمبر میں سامنے آنے والے اس فون کا فرنٹ کیمرہ 7 میگا پکسل سنسر سے لیس ہے جس میں فکسڈ فوکس اور ایف 2.2 آپرچر دیا گیا ہے، تاہم اس میں ایپل کا ٹرو ڈیپتھ کیمرا سسٹم بھی دیا گیا ہے جو کہ کسی منظر کی تفصیلات اور دھندلے پن کو بہتر بناتا ہے۔ یہ ان چند اولین ڈیوائسز میں سے ایک ہے جس میں فرنٹ کیمرے میں ایچ ڈی آر پراسیسنگ کا فیچر موجود ہے۔

2۔ شیاﺅمی می مکس 3 (83 پوائنٹس)

فوٹو بشکریہ شیاؤمی
فوٹو بشکریہ شیاؤمی

شیاﺅمی کے اس فون میں فرنٹ پر ڈوئل کیمرا سیٹ اپ دیا گیا ہے تاکہ لوگ زیادہ اچھی پورٹریٹ فوٹوز لے سکیں جس میں bokeh ایفیکٹ بھی موجود ہے، مگر اس میں ایچ ڈی آر پراسیسنگ کا آپشن نہ ہونا اسے نمبرون کی بجائے 2 پر لے گیا، اس کے علاوہ فکسڈ فوکس کی وجہ سے یہ دیگر ڈیوائسز سے زیادہ محدود ہے جس سے گروپ شاٹ متاثر ہوتے ہیں۔

1۔ سام سنگ گلیکسی نوٹ 9 (92 پوائنٹس) اس نمبر پر ٹائی ہے

فوٹو بشکریہ سام سنگ
فوٹو بشکریہ سام سنگ

سام سنگ کا یہ فلیگ شپ فون 8 میگا پکسل ریزولوشن اور 1.22µm پکسل سے لیس ہے، جبکہ سلوموشن ویڈیو کا آپشن بھی موجود ہے اور سیلفی کے شوقین افراد کے لیے ویڈیوز بنانے کا تجربہ کافی زبردست ثابت ہوتا ہے، اس میں آٹو فوکس لینس بھی موجود ہے جو کہ عام طور پر سیلفی کیمروں میں نظر نہیں آتا۔

1۔ گوگل پکسل 3 (92 پوائنٹس)

اے ایف پی فوٹو
اے ایف پی فوٹو

گوگل نے اس میں فرنٹ پر ڈوئل کیمرا سیٹ اپ دیا ہے جس کے ساتھ پی ڈی اے ایف سسٹم بھی ہے جو کہ ڈیوائس کو فوکس کرنے میں مدد فراہم کرتا ہے، یہ کیمرا سسٹم 30 سے 120 سینٹی میٹر کے درمیان بہترین تصاویر لینے کی صلاحیت رکھتا ہے۔