پاکستان کے سب سے بڑے شہر کراچی میں اگرچہ ہر سال منعقد ہونے والے ’ایٹ فیسٹیول‘ میں کھانے کے شائقین کے لیے درجنوں اقسام کے کھانے موجود ہوتے ہیں۔

تاہم اس بار’عالمی یوم برداشت‘ کے موقع پر’آئی ایم کراچی‘ کی جانب سے شائقین کے لیے جاپان سے لے کر امریکا اور برطانیہ سے لے کر سری لنکا کے معروف کھانوں کو ایک ساتھ پیش کیا گیا۔

ثقافتی تنظیم کی جانب سے آئندہ برس فروری میں پہلی بار ایک ہفتے تک منعقد کیے جانے والے ’دوسرے انٹرنیشنل پبلک آرٹ فیسٹیول‘ کے لیے فنڈریزنگ ڈنر کا اہتمام کیا گیا، جس میں نہ صرف پاکستان کے معروف کھانے ’بریانی، کڑاہی اور پراٹھے‘ کو پیش کیا گیا بلکہ اس میں دیگر ممالک کے کھانوں کو بھی پیش کیا گیا۔

برٹش ہائی کمیشن کے 200 سالہ تاریخی ’آکٹن گارڈن‘ میں منعقد کیے گئے اس منفرد پروگرام کی خاص بات یہ تھی کہ اس میں پہلی بار ’سری لنکا، تھائی لینڈ، جاپان، اٹلی، فرانس، جرمنی، برطانیہ اور امریکا‘ کے قونصلیٹ خانوں کی جانب سے کھانوں کے اسٹالز لگائے گئے۔

عام طور پر پاکستان میں ہونے والے فوڈ یا ایٹ فیسٹیولز میں اگرچہ بیرون ممالک کے کھانے بھی دستیاب ہوتے ہیں، تاہم ان فیسٹیولز میں بیرون ممالک کے سفارتخانے یا قونصلیٹ خانے کھانوں کے اسٹالز نہیں لگاتے۔

آکٹن ہاؤس میں منعقد کیے گئے پروگرام میں سب سے زیادہ رش جاپانی اسٹال پر رہا اور حیران کن طور پر ’سوشی‘ وقت سے پہلے ہی ختم ہوگئی۔

جاپان کے بعد جرمنی کے کھانوں کو بھی لوگوں نے سراہا اور جاپانی قونصلیٹ خانے کے عملے کی بھی تعریف کی۔

یہ بھی پڑھیں:کراچی ایٹ فیسٹیول 2019: مختلف اقسام کے لذیذ کھانے پیش

تھائی لینڈ کے روایتی کھانے بھی پاکستانی شائقین کو خوب پسند آئے اور لوگ نہ صرف ’پپایا سلاد‘ سے لطف اندوز ہوئے بلکہ کھانے کے شائقین تھائی لینڈ کے ذائقہ دار ’پتھائی‘ اور ’نوڈلز‘ سے بھی لطف اندوز ہے۔

فرانسیسی قونصلیٹ خانے کی جانب ’کش‘ نامی نمکین اور ’سوئس‘ نامی میٹھی ڈش پیش کی گئی اور لوگوں کی جانب سے دونوں کھانوں کی تعریف بھی کی گئی۔

اٹلی کی جانب سے تازہ پیزا بھی پیش کیا گیا جب کہ پاکستان کی طرف سے رول پراٹھے، بریانی اور کڑاہی جیسے کھانے پیش کیے گئے۔

تقریب میں نہ صرف پاکستانی بلکہ غیر ملکی مہمانوں نے بھی شرکت کی اور زیادہ ترغیر ملکی مہمانوں نے ایشیائی کھانوں خاص طور پر پاکستان، تھائی لینڈ، جاپان اور سری لنکا کے کھانوں کی تعریف کی۔

مزید پڑھیں: ایک منفرد فوڈ فیسٹیول

خیال رہے کہ اس کھانے کی تقریب کا مقصد فروری 2020 میں ہونے والے آرٹ فیسٹیول کے لیے فنڈ جمع کرنا تھا، آرٹ فیسٹیول آئندہ برس کراچی کے مختلف علاقوں میں منعقد ہوگا اور پہلی بار آرٹ فیسٹیول ایک ہفتے تک جاری رہے گا۔