صحت غذ١ کاروبار موبائل فون‎حیرت انگیز غزہ المیہ

نیوزی لینڈ نے گلین فلپس اور باؤلرز کی عمدہ کارکردگی کی بدولت سری لنکا کو 65 رنز سے شکست دے کر سیمی فائنل تک رسائی کی امیدیں روشن کر لی ہیں۔

سڈنی میں کھیلے جا رہے سپر 12 مرحلے کے گروپ 1 کے میچ میں نیوزی لینڈ نے ٹاس جیت کر پہلے بیٹنگ کا فیصلہ کیا۔

ٹاس جیت کر پہلے بیٹنگ کرنے کا فیصلہ درست ثابت نہ ہوا اور نیوزی لینڈ کی ٹیم صرف 15 رنز پر کپتان کین ولیمسن اور دونوں اوپنرز سے محروم ہو گئی۔

سری لنکا کو جلد ہی چوتھی وکٹ بھی لینے کا موقع ملا لیکن نسانکا نے 13 کے انفرادی اسکور پر فلپس کا آسان کیچ گرا دیا جس کی سری لنکا کو بھاری قیمت چکانی پڑی۔

اس مرحلے پر گلین فلپس کا ساتھ دینے ڈیرل مچل آئے اور دونوں نے ذمے دارانہ کھیل پیش کرتے ہوئے اسکور کو آگے بڑھانا شروع کیا، فلپس نے قدرے جارحانہ انداز اپنایا اور مچل کے ہمراہ چوتھی وکٹ کے لیے 84 رنز جوڑے، مچل نے 24 گیندوں پر 22 رنز بنائے۔

تاہم دوسرے اینڈ سے فلپس نے شاندار بیٹنگ جاری رکھی اور ٹی20 ورلڈ کپ میں سنچری کرنے کا اعزاز حاصل کر لیا۔

انہوں نے 64 گیندوں پر چار چھکوں اور 10 چوکوں کی مدد سے 104 رنز کی اننگز کھیلی جس کی بدولت نیوزی لینڈ نے مقررہ اوورز میں 7 وکٹوں کے نقصان پر 167 رنز بنائے۔

سری لنکا کی جانب سے کاسن رجیتھا نے دو جبکہ مہیش تھکشانا، دھننجیا ڈی سلوا، ونندو ہسارنگا اور لہیرو کمارا نے ایک ایک وکٹ لی۔

سری لنکا کی اننگز کا آغاز تباہ انداز میں ہوا اور پہلے ہی اوور میں ٹم ساؤدھی نے پتھم نسانکا کو کھوتا کھولنے کا موقع دیے بغیر ہی چلتا کردیا۔

ابھی سری لنکن ٹیم اس نقصان سے سنبھلی بھی نہ تھی کہ اگلے اوور میں ٹرینٹ بولٹ نے کوشل مینڈس اور دھننجیا ڈی سلوا کی وکٹیں حاصل کر لیں اور پھر اپنے اگلے اوور میں چرتھ اسالانکا کا کام بھی تمام کردیا۔

8 رنز پر چار وکٹیں گرنے کے بعد بھنوکا راجا پکسے اور چمیکا کرونارتنے نے اسکور 24 تک پہنچایا ہی تھا کہ مچل سینٹنر نے اپنے اوور کی پہلی گیند پر کرونارتنے کو چلتا کر کے سری لنکا کو پانچواں نقصان پہنچایا۔

پانچ وکٹیں گرنے کے بعد راجا پکسے اور کپتان داسن شناکا نے 34 رنز کی ساجھے داری قائم کی لیکن 58 کے مجموعے پر راجاپکسے کی 34 رنز کی اننگز اختتام کو پہنچی جبکہ شناکا نے 35 رنز بنائے۔