عالمی وبا کورونا وائرس
لائیو

عالمی وبا کورونا وائرس

اہم نکات:

  • کووِڈ-19 گزشتہ سال دسمبر میں چین میں رپورٹ ہوا، 11مارچ 2020 کو اسے ’’عالمی وبا‘‘ قرار دیا گیا۔

  • 180 سے زائد ممالک اس عالمی وبا کا شکار ہوچکے ہیں۔

  • دنیا بھر میں 5 لاکھ 97 ہزار سے زائد افراد متاثر، 27 ہزار سے زائد ہلاک اور ایک لاکھ 31 ہزار سے زائد افراد صحت یاب ہوچکے۔

  • پاکستان میں متاثرہ افراد کی تعداد 1492 ہوگئی اور 12 افراد انتقال کرچکے ہیں جبکہ 25 افراد صحتیاب بھی ہوئے۔

  • کورونا وائرس سے متعلق تازہ ترین خبروں کیلئےکلک کریں۔

تازہ ترین
10:26 PM

بھارت کے مشہور گرو بلدیو سنگھ کورونا وائرس کا شکار ہو کر ہلاک

10:10 PM

ووہان میں لاک ڈاؤن میں نرمی، معمولات زندگی بحال ہونے لگے

9:51 PM

پنجاب میں مزید 27 کیسز کی تصدیق، مجموعی تعداد 557 ہوگئی

9:30 PM

کراچی: ایف آئی آر میں امام مساجد بھی نامزد

9:23 PM

مائیک پومپیو کوروناوائرس کے خلاف پاکستانی ڈاکٹر کی کوششوں کے معترف

9:21 PM

پنجاب میں ڈاکٹرز، عملے کو ایک ماہ کی اضافی بنیادی تنخواہ دینے کا اعلان

9:15 PM

وزیراعلیٰ سندھ کی صوبے بھر میں 14 سی سی یو قائم کرنے کی ہدایت

9:13 PM

پنجاب میں کورونا وائرس کے کیسز 500 سے تجاوز کر گئے

9:08 PM

چین کے شہر ووہان سے لاک ڈاؤن ختم کرنے کا عمل شروع

8:45 PM

برطانیہ میں کورونا وائرس سے مزید 260 افراد ہلاک، مجموعی تعداد 1019 ہوگئی

8:39 PM

بلوچستان میں 5 مریضوں کا اضافہ، متاثرین 138 ہوگئے

7:41 PM

مختلف قرنطینہ مراکز میں 7 ہزار 180 افراد موجود ہیں، ظفر مرزا

7:37 PM

ملک کی مشرقی و مغربی سرحدیں مزید 2 ہفتے بند رکھنے کا فیصلہ

7:21 PM

سندھ میں مزید 12 کیسز کا اضافہ، تعداد 469 ہوگئی

6:36 PM

راولپنڈی میں ایک اور ڈاکٹر کورونا وائرس کا شکار

6:24 PM

حیدر آباد میں تبلیغی جماعت کے 210 افراد کو مسجد میں ہی روک دیا گیا

5:38 PM

کراچی: حکومتی پابندی کی خلاف ورزی پر مقدمات، مساجد کے امام زیرحراست

5:28 PM

ملک میں اب تک کورونا وائرس کے کیسز پر ایک نظر

5:18 PM

خیبرپختونخوا میں کورونا وائرس سے ایک خاتون کا انتقال

5:16 PM

عامر خان کی باکسنگ اکیڈمی کو قرنطینہ سینٹر بنانے کی پیشکش

5:11 PM

کراچی میں مقامی سطح پر منتقلی کے 17 نئے کیسز رپورٹ

4:33 PM

کورونا سے متعلق حساس مقامات کی کوریج کرنیوالے صحافیوں کیلئے حفاظتی کٹس تیار

4:24 PM

پاکستان پوسٹ نے لوگوں کے گھروں پر پینشن فراہم کرنا شروع کردیں

4:22 PM

بھارت میں لاک ڈاؤن کے سبب ہزاروں افراد کی نقل مکانی، آبائی علاقوں کو لوٹنے پر مجبور

4:12 PM

کورونا کے خلاف جنگ میں خواتین پولیس اہلکار بھی میدان میں آگئیں

4:10 PM

کورونا وائرس: ترقی پذیر ملکوں کیلئے بھاری فنڈنگ درکار ہے، آئی ایم ایف

4:00 PM

صحافیوں کے لیے کورونا جرنلسٹ ایپ متعارف کروا دی گئی

3:56 PM

والد کے انتقال کے 24 گھنٹے بعد ہی بیٹی بھی کورونا وائرس سے ہلاک

3:11 PM

میکسیکو میں وائرس سے 585 افراد ہلاک

3:09 PM

اردن میں کورونا وائرس سے پہلی ہلاکت

2:55 PM

یورپ: گھریلو تشدد میں اضافے کا خدشہ

2:38 PM

راولپنڈی: ڈھوک پراچہ کا علاقہ سیل

2:19 PM

پشاور میں قرنطینہ سینٹرز کے باہر خواتین پولیس اہلکار بھی تعینات

2:06 PM

اسلام آباد ضلعی انتظامیہ نے مستحق افراد میں راشن کی تقسیم شروع کردی

2:04 PM

کورونا وائرس: مسلم لیگ (ن) کی قومی صحت ٹاسک فورس کا اجلاس طلب

1:54 PM

بینکاک ایئرپورٹ پر پھنسے پاکستانیوں کی واپسی کیلئے خصوصی پرواز کی اجازت

1:46 PM

کوئٹہ میں پولیس کی جانب سے ڈاکٹرز کو سلامی کی ویڈیو

1:22 PM

تفتان قرنطینہ مرکز سے 204 زائرین کو لے کر بسیں روانہ

1:03 PM

پنجاب میں 7 کیسز سے تعداد 500 کے قریب پہنچ گئی

12:52 PM

'کورونا وائرس کے باعث پاکستان کی معیشت کمزور ہو چکی ہے'

12:04 PM

حکومتی ہدایات کی خلاف ورزی پر 4 امام گرفتار

12:02 PM

آسٹریلیا میں سماجی فاصلہ نہ رکھنے پر جرمانے کی سزا

11:55 AM

کراچی میں لاک ڈاؤن کے دوران بچوں نے انڈور گیمز کا سہارا لے لیا

11:54 AM

چین سے میڈیکل ٹیم پاکستان کیلئے روانہ

11:53 AM

’چین میں مقامی سطح پر وائرس منتقلی کا کوئی کیس رپورٹ نہیں ہوا‘

11:43 AM

بحری جہاز میں پھنسے مسافروں مدد کے لیے پکار اٹھے

11:33 AM

’دوستوں! جدوجہد ترک نہیں کرنا، مزاح کا احساس بہت ضروری ہے‘

10:51 AM

ایبٹ کا 5 منٹ میں کورونا کی تشخیص کرنیوالی کٹس پیش کرنے کا اعلان

10:39 AM

اسلام آباد کے پولی کلینک ہسپتال کے ڈاکٹر میں کورونا وائرس کی تشخیص

10:38 AM

سندھ پولیس کا اہلکار بھی کورونا وائرس کا شکار

مارچ 28, 2020 10:26pm

بھارت کے مشہور گرو بلدیو سنگھ کورونا وائرس کا شکار ہو کر ہلاک

بھارت میں مشہور گرو بلدیو سنگھ کورونا وائرس کا شکار ہو کر ہلاک ہو گئے ہیں اور ان سے مبینہ طور پر وائرس کا شکار ہونے والے ہزاروں افراد کو قرنطینہ کردیا گیا۔

70سال سکھ گرو بلدیو سنگھ یورپ میں کورونا وائرس سے سب سے زیادہ متاثرہ ممالک اٹلی اور جرمنی کا دورہ کر کے واپس لوٹے تھے اور وہاں سے واپس لوٹنے کے بعد انہوں نے پنجاب میں درجنوں دیہاتوں کے ہزاروں افراد کو تبلیغ کی۔

گرو کے گاؤں ضلع بنگا کے سینئر مجسٹریٹ گورو نے خبر رساں ایجنسی اے ایف پی سے گفتگو کرتے ہوئے کہا کہ متاثرہ گاوں میں سے 15گاؤں کو 18مارچ کو بند کردیا گیا ہے اور ہمارا ماننا ہے کہ ان گاؤں میں 15سے 20ہزار لوگ موجود ہیں۔

گرو اور ان کے دو ساتھیوں کے یورپ سے واپس لوٹنے کے بعد انہوں نے حکومت کی جانب سے خود قرنطینہ کرنے کے احکامات کو نظرانداز کیا جس کے نتیجے میں گرو بلدیو بیمار ہو کر انتقال کر گئے۔

مزید تفصیلات کے لیے یہاں کلک کریں۔

ای میل

مارچ 28, 2020 10:10pm

ووہان میں لاک ڈاؤن میں نرمی، معمولات زندگی بحال ہونے لگے

دنیا بھر میں کورونا وائرس کا سب سے پہلا مرکز بننے والے شہر ووہان میں لاک ڈاؤن کے خاتمے کا سلسلہ شروع ہو گیا ہے اور زندگی بتدریج معمول پر آنا شروع ہو گئی ہے۔

خبر رساں ایجنسی رائٹرز کے مطابق دو ماہ تک چین سمیت دنیا بھر سے کٹ کر رہنے والے شہر ووہان میں کورونا کا پہلا کیس دسمبر کے اواخر میں سامنے آیا تھا جس کے بعد ووہان کو مکمل طور پر لاک ڈاؤن کردیا تھا اور چین میں وائرس کے نتیجے میں 3ہزار سے زائد ہلاکتیں ہوئی۔

دو ماہ کے بعد کے طویل لاک ڈاؤن کی بدولت چینی حکام اس وائرس کے پھیلاؤ پر قابو پانے میں کامیاب رہے اور بالآخر اب ووہان تقریباً اس وائرس سے پاک ہو چکا ہے۔

صورتحال بہتر ہونے کے بعد ہفتے کی صبح شہر میں پہلی ٹرین کو داخل ہونے کی اجازت دے دی گئی جس کے ساتھ ہی زندگی دوبارہ معمول پر آنے لگی ہے۔

ووہان میں دوبارہ کام کے لیے لوٹنے والے 335سالہ زھینگ یولن نے کہا کہ کام کا دوبارہ آغاز امید کی نئی کرن ہے، اس سے کم از کم یہ ثابت ہوتا ہے کہ چین فاتح رہا۔

مکمل خبر پڑھنے کیلئے یہاں کلک کریں۔

مارچ 28, 2020 09:51pm

پنجاب میں مزید 27 کیسز کی تصدیق، مجموعی تعداد 557 ہوگئی

محکمہ صحت پنجاب کے ترجمان نے مزید 27 کیسز سامنے آنے کی تصدیق کی، اس طرح صوبے میں کورونا وائرس کے کُل مریضوں کی تعداد 557 ہوگئی۔

ان کا کہنا تھا کہ صوبے میں کورونا وائرس سے اموات کی تعداد 5 ہے جبکہ 5 مریض صحت یاب ہو کر ڈسچارج ہوئے۔

مارچ 28, 2020 09:30pm

کراچی: ایف آئی آر میں امام مساجد بھی نامزد

کراچی پولیس نے حکومتی پابندیوں کی خلاف ورزی کرنے والے افراد کے ساتھ ساتھ نیومیمن مسجد اور ڈیفنس کی بیت السلام مسجد کے امام، موذن اور خادم کو بھی فرسٹ انفارمیشن رپورٹ (ایف آئی آر) میں نامز کردیا۔

ایف آئی آر کے اندراج کے حوالے سے پولیس کا کہنا تھا کہ ضلع وسطی میں 21 مقدمات درج کیے گئے ہیں اور 23 افراد کو گرفتار کرلیا گیا ہے، ضلع شرقی میں 20 ایف آئی آر ، ضلع کورنگی میں 12 ایف آئی آر اور 2 گرفتاریاں عمل میں لائی گئی ہیں۔

پولیس کا کہنا تھا کہ ضلع ملیر میں 16 ایف آئی آر درج کی گئی ہیں اور 6 افراد حراست میں ہیں، ضل غربی میں 8 ایف آئی آر اور 3 افراد رفتار، ضلع جنوبی میں 3 ایف آئی آر اور ایک شہری گرفتار اور شہر میں 8 ایف آئی آر کے اندراج کے ساتھ ساتھ 3 افراد کو گرفتار کرلیا گیا ہے۔

سینئر پولیس افسر کا کہنا تھا کہ تمام مکتبہ فکر کے امام مساجد نے مبینہ طور پر پابندیوں کی خلاف ورزی کی تھی ان میں وہ آئمہ حضرات بھی شامل ہیں جن کے رہنماؤں نے حکومتی پابندیوں کی حمایت کی تھی۔

خبر کی تفصیل یہاں پڑھیں۔

مارچ 28, 2020 09:23pm

مائیک پومپیو کوروناوائرس کے خلاف پاکستانی ڈاکٹر کی کوششوں کے معترف

امریکی سیکریٹری آف اسٹیٹ مائیک پومپیو نے فل برائٹ پروگرام کے تحت تعلیم حاصل کرنے والے پاکستانی ڈاکٹر ضعیم ضیا کی کورونا وائرس کے خلاف کوششوں پر خراج تحسین پیش کیا۔

مائیک پومپیو نے کہا کہ ڈاکر ضعیم ضیا کی بطور ڈسٹرکٹ ہیلتھ افسر کورونا وائرس کے خلاف حکومت اقدامات کے تحت خدمات قابل تعریف ہیں۔

مارچ 28, 2020 09:21pm

پنجاب میں ڈاکٹرز، عملے کو ایک ماہ کی اضافی بنیادی تنخواہ دینے کا اعلان

وزیر صحت پنجاب ڈاکٹر یاسمین راشد نے کورونا وارڈز میں ڈیوڈی دینے والے ڈاکٹرز اور عملے کو ایک ماہ کی اضافی بنیادی تنخواہ دینے کا اعلان کردیا۔

سماجی رابطے کی ویب سائٹ پر ٹوئٹ میں یاسمین راشد نے کہا کہ 'کورونا وائرس کے خلاف جاری جنگ میں ہمارے ڈاکٹرز ، ہیلتھ پروفیشنلز کا سب سے بڑا کردار ہے اور یہ ہمارے ہیرو ہیں۔'

انہوں نے کہا کہ 'ان کو ایک ماہ کی اضافی تنخواہ الاؤنس کے طور پر دی جائے گی، ہم ان کی بھرپور کوششوں کا شکریہ ادا کرنا چاہتے ہیں۔'

مارچ 28, 2020 09:15pm

وزیراعلیٰ سندھ کی صوبے بھر میں 14 سی سی یو قائم کرنے کی ہدایت

وزیراعلیٰ سندھ سید مراد علی شاہ نے محکمہ صحت کے حکام کو ہدایت کی ہے کہ کراچی سمیت صوبے بھر میں 14 کریٹکل کیئر یونٹس (سی سی یو) قائم کردیے جائیں۔

انہوں نے کہا کہ مراکز کو وینٹی لیٹرز، مانیٹرز، پلس اوگزیمیٹر، سکشن مشینیں اور کمپریسرز سمیت دیگر آلات سے لیس کیا جائے۔

مارچ 28, 2020 09:13pm

پنجاب میں کورونا وائرس کے کیسز 500 سے تجاوز کر گئے

وزیر اعلیٰ پنجاب عثمان بزدار نے خصوصی اجلاس کے بعد میڈیا بریفنگ کے دوران صوبے میں کورونا وائرس کے مریضوں کی تعداد 530 ہونے کی تصدیق کی ہے۔

ان کا کہنا تھا کہ ان مریضوں میں ڈیرہ غازی خان میں 207، ملتان میں 75، لاہور میں 119، منڈی بہاوالدین میں 4، گجرات میں 51، گوجرانوالہ میں 10، جہلم میں 19، راولپنڈی میں 15، فیصل آباد میں 9، سرگودھا، میانوالی اور ننکانہ صاحب میں 2، 2 جبکہ نارووال، رحیم یار خان، اٹک، بہاولنگر اور خوشاب میں ایک، ایک مریض شامل ہیں۔

مکمل خبر یہاں پڑھیں۔

مارچ 28, 2020 09:08pm

چین کے شہر ووہان سے لاک ڈاؤن ختم کرنے کا عمل شروع

چین میں کورونا وائرس کے مرکز ووہان شہر میں وباپر قابو پانے کے بعد لاک ڈاؤن کو باقاعدہ طور پر ختمکرنے کا عمل شروع کردیا گیا ہے۔

رپورٹ کے مطابق حکام نے 2 مہینے تک لاک ڈاؤن جاری رکھنے کے بعد اس پر نرمی کرتے ہوئے خاندانوں کو ملنے اور سرحدوں کو کھولنے کا آغاز کردیا ہے جبکہ میٹرو سروس کو محدود کردیا گیا ہے۔

چینی حکومت نے کورونا وائرس کے خلاف اقدامات کرتے ہوئے غیر مقبول فیصلے کیے تھے جس کے تحت ایک کروڑ سے زائد آبادی کے حامل صنعتی شہر میں داخلے اور اخراج پر پابندی عائد کردی تھی۔

ووہان شہر میں لوگوں کو گھروں تک محدود کردیا گیا تھا، بس، ٹیکسی اور دیگر سروس کو بھی معطل کردیا گیا تھا تاہم اشیائے ضروریہ کے چند اسٹورز کھلے رکھنے کی اجازت دی گئی تھی۔

مارچ 28, 2020 08:39pm

بلوچستان میں 5 مریضوں کا اضافہ، متاثرین 138 ہوگئے

بلوچستان کے ہیلتھ ڈائریکٹریٹ کورونا وائرس سیل کے ترجمان کے مطابق ہفتہ کو کورونا وائرس کے 5 نئے مریض سامنے آئے جس کے بعد کُل مریضوں کی تعداد 138 ہوگئی۔

انہوں نے بتایا کہ اب تک کورونا وائرس کے ایک ہزار 275 منفی رزلٹ آئے اور مشتبہ مریضوں کی تعداد ایک ہزار 689 ہے جبکہ 2 مریض صحتیاب بھی ہوچکے ہیں۔

مکمل خبر یہاں پڑھیں۔

مارچ 28, 2020 07:41pm

مختلف قرنطینہ مراکز میں 7 ہزار 180 افراد موجود ہیں، ظفر مرزا

وزیر اعظم کے معاون خصوصی برائے صحت ڈاکٹر ظفر مرزا نے میڈیا بریفنگ کے دوران بتایا کہ 'پاکستان میں کورونا وائرس کے 12 ہزار 218 مشتبہ مریض ہیں لیکن ان کے ٹیسٹ ہونا باقی ہے، ملک میں اس وقت کورونا کے کنفرم کیسز ایک ہزار 408 ہیں ان میں چوبیس گھنٹے کے دوران 173 لوگوں کا اضافہ ہوا ہے۔'

ان کا کہنا تھا کہ 'ابھی تک ہمارے پاس 25 لوگوں کی مکمل صحتیاب ہونے کی رپورٹ ہے اور اس وقت مختلف ہسپتالوں میں 725 لوگ زیر علاج ہیں، گزشتہ چوبیس گھنٹے میں مزید 2 افراد کے جاں بحق ہونے کے بعد تعداد 11 ہوگئی ہے جن میں پنجاب میں سب سے زیادہ 5 افراد کی موت واقع ہوئی ہے۔'

معاون خصوصی نے کہا کہ 'پاکستان میں اس وقت 7 ہزار 180 افراد مختلف قرنطینہ مراکز میں موجود ہیں جن میں سے 3 ہزار 157 کے ٹیسٹ ہوچکے ہیں اور ان میں سے 799 کے ٹیسٹ مثبت آئے، قرنطینہ میں زیادہ تر افراد زائرین ہیں۔'

— فوٹو: ڈان نیوز
— فوٹو: ڈان نیوز

مکمل خبر یہاں پڑھیں۔

مارچ 28, 2020 07:37pm

ملک کی مشرقی و مغربی سرحدیں مزید 2 ہفتے بند رکھنے کا فیصلہ

وزیر اعظم کے معاون خصوصی برائے قومی سلامتی ڈاکٹر معید یوسف کا کہنا ہے کہ ملک کی مشرقی اور مغربی سرحدیں کورونا وائرس کی وبا کے باعث مزید 2 ہفتے بند رہیں گی۔

اسلام آباد میں میڈیا بریفنگ کے دوران معاون خصوصی برائے قومی سلامتی معید یوسف نے کہا کہ '13 مارچ کو قومی سلامتی کمیٹی نے یہ فیصلہ کیا تھا کہ ملک کے مغربی اور مشرقی سرحدیں 2 ہفتے کے لیے بند رہیں گی، وہ مدت آج پوری ہورہی تھی لیکن کورونا سے متعلق قومی رابطہ کمیٹی نے فیصلہ کیا ہے کہ یہ سرحدیں مزید 2 ہفتے کے لیے مکمل طور پر بند رہیں گی۔'

انہوں نے کہا کہ 'ہماری بندرگاہیں آپریٹ کر رہی ہیں، وہاں آپریشن جاری رہے گا اور وہاں ہماری اسکریننگ کا عمل بھی چلتا رہے گا۔'

مکمل خبر یہاں پڑھیں۔

مارچ 28, 2020 07:21pm

سندھ میں مزید 12 کیسز کا اضافہ، تعداد 469 ہوگئی

ہفتہ کی شاہ کو وزیر اعلیٰ سندھ کی زیر صدارت کورونا وائرس پر ٹاسک فورس کے 31ویں اجلاس میں بتایا گیا کہ صوبے میں متاثرین کی تعداد 469 ہوگئی ہے۔

ان کیسز میں 265 سکھر، 189 کراچی، ایک دادو، 7 لاڑکانہ اور 7 حیدر آباد میں سامنے آئے ہیں۔

اجلاس کو بتایا گیا کہ آج کراچی میں 12 نئے کیسز سامنے آئے ہیں جس کے بعد مقامی سطح پر منتقل ہونے والے کیسز کی تعداد 132 ہوگئی ہے۔

مکمل خبر یہاں پڑھیں۔

مارچ 28, 2020 06:36pm

راولپنڈی میں ایک اور ڈاکٹر کورونا وائرس کا شکار

ڈپٹی کمشنر (ڈی سی) راولپنڈی کیپٹن انوار الحق نے کہا ہے کہ ڈی ایچ کیو میں کام کرنے والا ڈاکٹر کورونا وائرس کا شکار ہوگیا ہے۔

ان کا کہنا تھا کہ متاثرہ ڈاکٹر کو ڈی ایچ کیو اسپتال میں ہی آئسولیشن میں رکھا جائے گا جبکہ ٹریول ہسٹری اور دیگر معلومات اکٹھی کر رہے ہیں۔

ڈی سی کیپٹن انوار الحق نے کہا کہ معلومات لی جا رہی ہیں کہ ڈاکٹر کو کورونا وائرس اوپی ڈی میں کام کرتے ہوئے لگا یا کسی اور جگہ سے لگا ہے۔

دوسری جانب ریسکیو 1122 بھی کورونا وائرس کو قابو کرنے کے لیے متحرک ہے اور شہر کے مختلف علاقوں کو کلورین ملے پانی سے دھویا جارہا ہے۔

ترجمان کے مطابق ریسکیو 1122 کے اہلکاروں کی جانب سے شہر کی مرکزی شاہراہوں اور ریلوے اسٹیشن روڈ کو کلورین ملے پانی سے دھویا گیا۔

مارچ 28, 2020 07:32pm

حیدر آباد میں تبلیغی جماعت کے 210 افراد کو مسجد میں ہی روک دیا گیا

حیدر آباد میں چین سے تعلق رکھنے والے تبلیغی جماعت کے رکن میں کوروناوائرس مثبت آنے پر مرکز میں موجود 210 افراد کو باہر جانے سے روک دیا گیا۔

ایس ایس پی حیدرآباد عدیل چانڈیو نے مسجد کو قرنطینہ قرار دینے کی تصدیق کی اور کہا کہ تمام افراد کو وہی روک دیا گیا ہے۔

پولیس اور مقامی انتظامیہ نے حفاظتہ اقدامات کے طور پر مرکز میں موجود تمام افراد کو باہر جانے کی اجازت نہیں دی جبکہ متاثرہ شخص اور ان کے بھائی کو لطیف آباد کے کوہسار ہسپتال میں رکھا گیا ہے جہاں مشتبہ افراد کے لیے قرنطینہ بنایا گیا ہے۔

انچارج ڈاکٹر سریش کا کہنا تھا کہ جب مذکورہ فرد میں وائرس مثبت آیا تو مریض کو لیاقت یونیورسٹی ہسپتال کی سٹی برانچ میں منتقل کردیا گیا تھا جبکہ ان کے بھائی کو اب بھی قرنطینہ میں رکھا گیا ہے تاہم ان کی رپورٹ منفی ہے۔

ان کا کہنا تھا کہ انہیں احتیاطی طور پر قرنطینہ میں رکھا گیا ہے۔

خبر کی تفصیل یہاں پڑھیں۔

مارچ 28, 2020 05:38pm

کراچی: حکومتی پابندی کی خلاف ورزی پر مقدمات، مساجد کے امام زیرحراست

صوبائی حکومت کی جانب سے عوام کے لیے نماز کے اجتماعات پر پابندی کی خلاف ورزی کرنے پر کراچی میں پولیس نے 88 مقدمات درج کرکے کم از کم 38 امام اور مساجد کے اسٹاف کو حراست میں لے لیا۔

مذکورہ فرسٹ انفارمیشن رپورٹس (ایف آئی آر) تعزیرات پاکستان کی دفعات 186، 188، 269 اور سندھ وبائی امراض ایکٹ 2014 کی شق 4 کے تحت درج کی گئیں۔

جن افراد کے خلاف مقدمات درج کیے گئے ان میں نیو میمن مسجد بولٹن مارکیٹ اور بیت الاسلام مسجد ڈی ایچ اے کے مساجد کا اراکین بھی شامل ہیں۔

مارچ 28, 2020 05:18pm

خیبرپختونخوا میں کورونا وائرس سے ایک خاتون کا انتقال

خیبرپختونخوا میں کورونا وائرس سے ایک خاتون انتقال کرگئیں، جس سے صوبے میں اموات کی تعداد 4 ہوگئیں۔

اس حوالے سے صوبائی وزیر اطلاعات کے مشیر اجمل وزیر نے اس موت کی تصدیق کی اور بتایا کہ خاتون کا تعلق لوئر دیر سے تھا۔

مزید برآں خاتون حال ہی میں عمرے سے واپس آئی تھیں اور ان کے انتقال کے بعد پورے گاؤں کو قرنطینہ کردیا گیا۔

مارچ 28, 2020 05:11pm

کراچی میں مقامی سطح پر منتقلی کے 17 نئے کیسز رپورٹ

سندھ میں بھی کورونا وائرس کے مزید 17 کیسز رپورٹ ہوئے جس کے بعد صوبے میں تعداد 457 ہوگئی۔

محکمہ صحت سندھ کی جانب سے بتایاگیا کہ 17 نئے کیسز کراچی میں رپورٹ ہوئے جس کے بعد شہر قائد میں متاثرین 181 ہوگئے۔

اس کے علاوہ تین افراد حیدرآباد اور ایک دادو سےمتاثر ہوا ہے جبکہ 14 افراد صحتیاب ہوچکے ہیں۔

صوبائی محکمہ صحت کے مطابق اب تک ایک فرد کا انتقال ہوا ہے اور 170 زیر علاج ہیں، اس طرح زائرین کے سوا سندھ کے ان کیسز میں 131 مقامی سطح پر منتقلی کے ہیں۔

مارچ 28, 2020 04:33pm

کورونا سے متعلق حساس مقامات کی کوریج کرنیوالے صحافیوں کیلئے حفاظتی کٹس تیار

وزیراعظم کی معاون خصوصی ڈاکٹر فردوس عاشق اعوان نے کہا ہے کہ جس طرح کورونا وائرس کے مریضوں کا علاج کرنے والے ڈاکٹر اور طبی عملے کو ذاتی تحفظ کا سازو سامان دیا جارہا ہے وہیں ہم نے نیشنل ڈزاسٹر منیجمنٹ اتھارٹی کے ساتھ مل کر ایک جرنلسٹ پروٹیکشن کٹ بنائی ہے تا کہ حساس مقامات اور قرنطینہ مراکز کی کوریج کرنے والے صحافیوں کا تحفظ یقینی بنایا جاسکے۔

ڈاکٹر فردوس عاشق اعوان نے کہا کہ مذکورہ کٹس صوبائی وزیراطلاعات تقسیم کریں گے اور صحافی ان سے رابطہ کر کے یہ کٹس حاصل کرسکتے ہیں۔

مکمل خبر یہاں پڑھیں۔

مارچ 28, 2020 04:24pm

پاکستان پوسٹ نے لوگوں کے گھروں پر پینشن فراہم کرنا شروع کردیں

کورونا وائرس کے باعث ملک میں جاری جزوی لاک ڈاؤن اور پابندیوں کے باعث پاکستان پوسٹ نے لوگوں کے گھروں میں پینشن پہنچانا شروع کردیں۔

وزیر مواصلات مراد سعید کی جانب سے پینشن تقسیم کرنے والے پوسٹ آفس کے ملازمین کو 'اصل ہیرو' قرار دیتے ہوئے کہا کہ ان ہیروز کی وجہ سے 15 لاکھ بزرگ لوگوں کو ان کے گھروں میں پینشن فراہم کی جائے گی۔

یہی نہیں بلکہ پاکستان پوسٹ آفس کی اس کاوش کو اقوام متحدہ کی خصوصی ایجنسی یونیورسٹی پوسٹ یونین کی جانب سے بھی سراہا گیا۔

مارچ 28, 2020 04:22pm

بھارت میں لاک ڈاؤن کے سبب ہزاروں افراد کی نقل مکانی، آبائی علاقوں کو لوٹنے پر مجبور

بھارت میں سوا ارب سے زائد آبادی کے لاک ڈاؤن کے سبب ملک کی غریب آبادی شدید مشکلات سے دوچار ہو گئی ہے اور لاک ڈاؤن کی وجہ سے روزگار کے خاتمے اور بھوک کے سبب مختلف شہروں سے آئے لوگ اپنے آبائی علاقوں کو لوٹنے پر مجبور ہو گئے ہیں۔

بھارت میں اب کورونا وائرس کے سبب 17افراد ہلاک اور 700سے زائد متاثر ہو چکے ہیں اور بھارتی وزیر اعظم نے منگل کو ملک میں 21روزہ لاک کا اعلان کیا تھا۔

بس ٹرین سمیت ٹراسپورٹ کے تمام ذرائع بند ہونے کے سبب لوگ ہائی وے پر پیدل ہی سفر کر کے گھروں کو لوٹنے پر مجبور ہو گئے ہیں۔

ریاست گجرات کے شہر احمد آباد کے شاپنگ مال میں کام کرنے والے ٹھاکر نامی شخص نے کہا کہ مرنے کے بجائے ہم نے پیدل چلنے کا فیصلہ کیا ہے۔

سورت میں تعمیراتی کام کر کے روزانہ 4ڈالر کمانے والے جما رتھوا بھی متاثرین میں شامل ہیں اور انہوں نے بھی پیدل سفر کرتے ہوئے گھر واپسی کی راہ کی ہے۔

مکمل خبر پڑھنے کیلئے یہاں کلک کریں

مارچ 28, 2020 04:12pm

کورونا کے خلاف جنگ میں خواتین پولیس اہلکار بھی میدان میں آگئیں

ملک میں بڑھتے کورونا وائرس سے جاری جنگ میں خواتین پولیس اہلکار بھی میدان میں آگئیں اور قرنطینہ مرکز کی پوزیشن سنبھال لی۔

ضلع دوران پور میں خواتین اہلکاروں کی جانب سے پوزیشن سنبھالی گئی۔

اس حوالے سے پولیس حکام کا کہنا تھا کہ 25 سے زاہد خواتین پولیس ضلعی انتظامیہ کے ساتھ بھی ڈیوٹی سر انجام دے رہی ہیں جبکہ یہ خواتین اہلکار صوبے کے بڑے ہسپتال ایل آر ایچ میں بھی فرائض سر انجام دے رہی ہیں۔

پولیس حکام کے مطابق دوران پور قرنطینہ میں تفتان بارڈر سے آنے والے زائرین کو رکھا گیا ہے اور قرنطینہ میں ڈیوٹی پر موجود خواتین پولیس کو خصوصی سوٹ فراہم کیے گئے ہیں۔

مارچ 28, 2020 04:10pm

کورونا وائرس: ترقی پذیر ملکوں کیلئے بھاری فنڈنگ درکار ہے، آئی ایم ایف

انٹرنیشنل مانیٹری فنڈ(آئی ایم ایف) کی سربراہ کرسٹالینا جیورجیوا نے کہا ہے کہ کورونا وائرس کی وبا کے سبب عالمی معیشت زوال کی جانب گامزن ہے اور ترقی پذیر ملکوں کی مدد کے لیے بھاری فنڈنگ درکار ہے۔

انہوں نے آن لائن پریس کانفرنس سے خطاب کرتے ہوئے کہا کہ ہم عالمی کساد بازاری میں داخل ہو چکے ہیں جو 2009 میں عالمی مالیاتی بحران کے بعد رونما ہونے والی صورتحال سے بھی بدتر ہو گی۔

کرسٹینا جیورجیوا نے کہا کہ کم آمدن کے حامل 80سے زائد ممالک پہلے ہی آئی ایم ایف سے ایمرجنسی امداد کی درخواست کر چکے ہیں۔

ان کا کہنا تھا کہ دنیا بھر میں معیشت رکنے سے ہمیں عالمی مارکیٹوں کی مدد کے لیے بھی کم از کم 25کھرب ڈالر کی خطیر رقم درکار ہے۔

مکمل خبر پڑھنے کیلئے یہاں کلک کریں

مارچ 28, 2020 03:56pm

والد کے انتقال کے 24 گھنٹے بعد ہی بیٹی بھی کورونا وائرس سے ہلاک

ہیتھرو ایئرپورٹ کے امیگریشن افسر سدھیر شرما کی کورونا وائرس سے ہلاکت کے 24 گھنٹے بعد ہی ان کی بیٹی پوجا کا بھی کورونا وائرس کے سبب انتقال ہوگیا۔

فوٹو: دی سن
فوٹو: دی سن

دی سن کی رپورٹ کے مطابق ٹرمینل 3 پر کام کرنے والے 61 سالہ سدھیر شرما کی کورونا وائرس سے ہلاکت کے بعد ان کی فارماسسٹ بیٹی 33 سالہ پوجا بھی جان کی بازی ہار گئیں۔

مزید تفصیلات یہاں پڑھیں۔

مارچ 28, 2020 03:11pm

میکسیکو میں وائرس سے 585 افراد ہلاک

میکسیکو میں کورونا وائرس سے ہلاکتوں کی تعداد 585 ہوگئی۔

میکسیکو کی وزارت صحت کے مطابق ملک میں کورونا وائرس سے متاثرہ 717 کیسز رپورٹ ہوئے جبکہ ایک روز قبل ان کی تعداد 585 تھی۔

وزارت نے یہ بھی کہا کہ میکسیکو میں اس وائرس سے مجموعی طور پر 12 اموات ہوئیں جبکہ ایک دن پہلے 8 اموات تھیں۔

مارچ 28, 2020 03:09pm

اردن میں کورونا وائرس سے پہلی ہلاکت

اردن کی سرکاری خبر رساں ایجنسی پیٹرا کے مطابق کورونا وائرس سے 80 سالہ خاتون ہلاک ہوگئیں۔

اس ضمن میں بتایا گیا کہ یہ اردن میں وائرس سے پہلی ہلاکت ہے۔

اردن میں 235 تصدیق شدہ وائرس کے مریض ہیں۔

21 مارچ کو اردن نے اپنی فضائی حدود اور دیگر سرحدی گزرگاہوں کو بند کرنے کے بعد غیر معینہ مدت تک مکمل لاک ڈاؤن نافذ کردیا تھا۔

مارچ 28, 2020 02:55pm

یورپ: گھریلو تشدد میں اضافے کا خدشہ

کورونا وائرس کے عدم پھیلاؤ کے لیے شہریوں کو گھروں میں رہنے پر زور دیا جارہا ہے جبکہ گھریلو تشدد کا نشانہ بننے والوں کی مدد کرنے والی ایسوسی ایشنز نے گھریلو تشدد میں اضافے کا خدشہ ظاہر کردیا۔

خبررساں ادارے اے ایف پی کے مطابق جرمن فیڈرل ایسوسی ایشن برائے خواتین کے مشاورتی مراکز اور ہیلپ لائنز (بی ایف ایف) نے کہا کہ برلن سے لے کر پیرس، میڈرڈ، روم اور بریٹیسلاوا تک بہت سے لوگوں کے لیے ان کا گھر پہلے سے ہی محفوظ جگہ نہیں ہے۔

مزید پڑھنے کیلئے یہاں کلک کریں

مارچ 28, 2020 02:38pm

راولپنڈی: ڈھوک پراچہ کا علاقہ سیل

راولپنڈٰی میں صادق آباد کے علاقے ڈھوک پراچہ کو کورونا وائرس کے باعث سیل کردیا گیا۔

ڈھوک پراچہ اور اس سے متصل ڈھوک کشمیریاں اور مجسٹریٹ کالونی سے کورونا وائرس کے مشتبہ مریض سامنے آنے پر یہ فیصلہ کیا گیا۔

علاوہ ازیں ڈھوک پراچہ کے علاقے میں پویس کی بھاری نفری نعینات کردی گئی۔

مارچ 28, 2020 02:06pm

اسلام آباد ضلعی انتظامیہ نے مستحق افراد میں راشن کی تقسیم شروع کردی

اسلام آباد انتظامیہ نے لاک ڈاؤن سے متاثر ہونے والے یومیہ اجرت کمانے والے افراد میں راشن کی تقسیم شروع کردی ہے۔

اسسٹنٹ کمشنر اسداللہ نے بتایا کہ متاثرہ علاقوں میں مستحق افراد تک راشن کی فراہمی کے لیے مختلف عطیات دہندگان انتظامیہ کی معاونت کررہے ہیں۔

ان کا کہنا تھا کہ پناگاہوں میں بھی مفت خوراک اور عارضی مسکن فراہم کیا جارہا ہے۔

مارچ 28, 2020 02:04pm

کورونا وائرس: مسلم لیگ (ن) کی قومی صحت ٹاسک فورس کا اجلاس طلب

پاکستان مسلم لیگ (ن) کی قومی صحت ٹاسک فورس کا اجلاس طلب کرلیا گیا۔

مذکورہ اجلاس میں ملک میں کورونا کی موجودہ صورتحال سے متعلق طبی مائرین اور ڈاکٹرز سے مشاورت کی جائے گی۔

علاوہ ازیں اجلاس میں مسلم لیگ (ن) کے صدر شہباز شریف ویڈیو لنک کے ذریعے ڈاکٹرز اور طبی ماہرین سے مشاورت بھی کریں گے۔

مارچ 28, 2020 01:54pm

بینکاک ایئرپورٹ پر پھنسے پاکستانیوں کی واپسی کیلئے خصوصی پرواز کی اجازت

کورونا وائرس کی وجہ سے بینکاک ایئرپورٹ پر پھنسے پاکستانیوں کی واپسی کے معاملے میں خصوصی پرواز کی اجازت دے دی گئی۔

اس حوالے سے ترجمان ایوی ایشن ڈویژن عبدالستار کھوکھر کا کہنا تھا کہ خصوصی پرواز کے ذریعے 60 کے قریب پاکستانی وطن واپس پہنچیں گے۔

ترجمان کے مطابق پرواز کو صرف ایک بارکے لیے پاکستان آنے کی اجازت دی گئی اور یہ غیر ملکی ایئرلائن کی پرواز رات 10 بجکر20 منٹ پر اسلام آباد پہنچے گی۔

انہوں نے کہا کہ واپس آنے والے پاکستانیوں کی وزارت صحت کی ہدایت پر سخت اسکرینگ کی جائے گی۔

مارچ 28, 2020 01:22pm

تفتان قرنطینہ مرکز سے 204 زائرین کو لے کر بسیں روانہ

تفتان سرحد پر قرنطینہ میں رہنے والے 204 زائرین کو اپنے گھروں تک واپس پہنچانے کے لیے 7 بسیں روانہ ہوگئیں۔

قرنطینہ مرکز سے نکلنے والی 7 بسوں میں موجود 204 زائرین میں 77 بلوچستان، 63 پنجاب، 59 سندھ اور 5 خیبرپختونخوا سے ہیں۔

مارچ 28, 2020 01:03pm

پنجاب میں 7 کیسز سے تعداد 500 کے قریب پہنچ گئی

ملک کے سب سے بڑے صوبے پنجاب میں کورونا وائرس کے 7 نئے کیسز سامنے آئے۔

ترجمان محکمہ صحت پنجاب قیصر آصف کا کہنا تھا کہ صوبے میں مصدقہ متاثرین کی تعداد 497 ہوگئی۔

انہوں نے بتایا کہ اب تک صوبے میں 5 اموات ہوئیں جبکہ 4 مریض صحت یاب ہوئے۔

متاثرین کی تفصیل سے متعلق انہوں نے بتایا کہ ڈیرہ غازی خان سے 207 اور ملتان سے 46 زائرین کے علاوہ لاہور میں 116 افراد میں کورونا وائرس کی تشخیص ہوئی۔

مارچ 28, 2020 12:04pm

حکومتی ہدایات کی خلاف ورزی پر 4 امام گرفتار

پولیس اور قانون نافذ کرنے والے اداروں نے صوبہ پنجاب کے علاقے گکھر منڈی میں نماز جمعہ کے اجتماع پر پابندی کی خلاف ورزی کرنے والے 4 امام گرفتار کرلیے۔

ڈان اخبار کی رپورٹ کے مطابق حکومت پنجاب نے نماز پنجگانہ اور جمعہ کی ادائیگی کے وقت بند رکھنے اور مؤذن اور امام سمیت صرف 4 سے 5 افراد کے لیے مسجد میں نماز کی ادائیگی کی اجازت دی تھی۔

پولیس نے خلاف ورزی کرنے والوں کے خلاف مقدمہ درج کرلیا جبکہ ایک امام فرار ہونے میں کامیاب ہوگیا۔

مارچ 28, 2020 12:02pm

آسٹریلیا میں سماجی فاصلہ نہ رکھنے پر جرمانے کی سزا

آسٹریلیا نے کورونا وائرس کے پیش نظر سماجی فاصلہ کے لیے واضع کردہ اصولوں پر سختی عمل درآمد شروع کردیا۔

آسٹریلیا نے کورونا وائرس کے عدم پھیلاؤ کے لیے شہریوں کو گھر میں رہنے کی ہدایت کی اور کہا کہ جو ایسا نہیں کرے گا اسے جرمانہ ہوگا۔

علاوہ ازیں آسٹریلیا نے ساحل سمندر عوامی تفریح کے لیے بند کردیا۔

مزید پڑھیں

مارچ 28, 2020 11:54am

چین سے میڈیکل ٹیم پاکستان کیلئے روانہ

چین سے 8 اراکین پر مشتمل میڈیکل ٹیم پاکستان آنے کے لیے روانہ ہوگئی۔

چینی سفارتخانے سے ایک ٹوئٹر پیغام میں بتایا کہ میڈیکل ٹیم وبا کی روک تھام، قابو کرنے، تشخیص اور علاج میں مہارت رکھتی ہے۔

مارچ 28, 2020 11:53am

’چین میں مقامی سطح پر وائرس منتقلی کا کوئی کیس رپورٹ نہیں ہوا‘

چین میں مقامی سطح پر وائرس منتقلی کا کوئی کیس رپورٹ نہیں ہوا جبکہ غیرملکیوں کے داخل پر پابندی برقرار ہے۔

مارچ 28, 2020 11:43am

بحری جہاز میں پھنسے مسافروں مدد کے لیے پکار اٹھے

بحرالکاہل کے ساحل پاناما میں بحری جہاز میں پھنسے 130 سے زائد مسافروں نے مدد کا مطالبہ کردیا۔

خبررساں ادارے رائٹرز کے مطابق مسافر انفلوئنزا جیسے علامات میں مبتلا ہوگئے ہیں۔

واضح رہے کہ 4 مسافر کورونا وائرس سے ہلاک بھی ہوچکے ہیں۔

جہاز کے کم از کم 2 درجن مسافر کارونا وائرس میں مبتلا ہیں۔

مارچ 28, 2020 11:33am

’دوستوں! جدوجہد ترک نہیں کرنا، مزاح کا احساس بہت ضروری ہے‘

تاریخ کے دو بڑے حادثات میں زندہ بچ جانے والوں نے کورونا وائرس کے پس منظر اپنے پیغام میں کہا کہ ’دوستوں! جدوجہد ترک نہیں کرنا، مزاح کا احساس بہت ضروری ہے‘۔

واضح رہے کہ 2010 میں چلی کی کان گرنے اور 1972 میں اینڈیس طیارے کے حادثے میں بچ جانے والوں نے اپنا پیغام دیا۔

مارچ 28, 2020 10:51am

ایبٹ کا 5 منٹ میں کورونا کی تشخیص کرنیوالی کٹس پیش کرنے کا اعلان

معروف ادویہ ساز امریکی کمپنی ایبٹ نے ایسی کٹس متعارف کروانے کا اعلان کیا ہے جن سے صرف 5 منٹ میں کورونا وائرس کی تشخیص کرنا ممکن ہوگا۔

مارچ 28, 2020 10:39am

اسلام آباد کے پولی کلینک ہسپتال کے ڈاکٹر میں کورونا وائرس کی تشخیص

اسلام آباد میں پولی کلینک ہسپتال کے ایک ڈاکٹر میں کورونا وائرس کا ٹیسٹ مثبت آگیا۔

ڈان اخبار کی رپورٹ کے مطابق ڈپٹی کمشنر اسلام آباد حمزہ شفقت کی جانب سے رات گئے جاری کی گئی ایک رپورٹ کے مطابق پولی کلینک کے ایک ڈاکٹر کا کووڈ 19 کا ٹیسٹ مثبت آیا۔

مذکورہ ڈاکٹر ہسپتال کے میڈیسن وارڈ میں اپنے فرائض انجام دے رہا تھا۔

علاوہ ازیں چونکہ متاثرہ ڈاکٹر ایک ہاسٹل میں رہائش پذیر تھا تو وہاں رہنے والے باقی تمام ڈاکٹرز کو او جی ڈی سی ایل میڈیکل سینٹر اسلام آباد میں قائم قرنطینہ مرکز بھیج دیا گیا۔

رپورٹس کے مطابق وفاقی دارالحکومت کے دوسرے بڑے سرکاری ہستپال پولی کلینک کو سیل کیا جارہا ہے۔

مارچ 28, 2020 10:38am

سندھ پولیس کا اہلکار بھی کورونا وائرس کا شکار

سندھ پولیس کا ایک اہکار بھی کورونا وائرس سے متاثر ہوگیا۔

سندھ پولیس کے ٹوئٹر اکاؤنٹ سے جاری پیغام میں بتایا کہ کراچی کے ضلع جنوبی میں تفتیشی برانچ میں کام کرنے والے 49 سالہ یٰسین گجر میں کورونا وائرس کی تشخیص ہوئی۔

انہیں بخار اور کھانسی ہونے پر چند روز قبل انڈس ہسپتال لے جایا گیا تھا جہاں ان کا کورونا ٹیسٹ کیا گیا جو مثبت آیا۔