وزیر اعظم شہباز شریف نے وزارت عظمیٰ کا منصب سنبھالنے پرسری لنکا کے صدر رانیل وکرمے سنگھے کی طرف سے مبارک باد کے پیغام پر ان کا شکریہ ادا کیا ہے۔

سماجی رابطے کی ویب سائٹ ’ایکس‘ پر اپنی پوسٹ میں وزیر اعظم شہباز شریف نے کہا کہ نیک تمناؤں کے اظہار پر سری لنکا کے صدر کا شکریہ ادا کرتا ہوں۔

وزیر اعظم نے اس اعتماد کا بھی اظہار کیا کہ پاکستان اور سری لنکا کے درمیان تعلقات آنے والے دنوں میں تسلسل کے ساتھ مضبوط سے مضبوط تر ہوں گے۔

نومنتخب صدر آصف علی زرداری نے عہدے کا حلف اٹھا لیا۔

حلف برداری کی تقریب ایوان صدر میں منعقد ہوئی جہاں چیف جسٹس آف پاکستان جسٹس قاضی فائز عیسیٰ نے آصف علی زرداری سے صدر کے عہدے کا حلف لیا۔

تقریب میں سبکدوش ہونے والے صدر ڈاکٹر عارف علوی، وزیر اعظم شہباز شریف، تینوں مسلح افواج کے سربراہان، بلاول بھٹو زرداری، بختاور بھٹو زرداری، آصفہ بھٹو زرداری اور سیاسی رہنما موجود تھے۔

نومنتخب صدر آصف علی زرداری کی تقریب حلف برداری ایوان صدر میں جاری ہے۔

تقریب میں چیئرمین پاکستان پیپلزپارٹی بلاول بھٹو زرداری، گورنر سندھ، آصفہ بھٹو، بختاور بھٹو، اراکین قومی و صوبائی اسمبلی، دیگر شخصیات موجود ہیں۔

چیف جسٹس قاضی فائز عیسیٰ نومنتخب صدر آصف زرداری سے حلف لیں گے

پاکستان مسلم لیگ (ن) کے رہنما خواجہ سعد رفیق نے کہا ہے کہ نفرت کی بنیاد پر سیاست آگے نہیں بڑھے گی۔

سماجی رابطے کی ویب سائٹ جاری ایک بیان میں ان کا کہنا تھا کہ آپ نے جو اسمبلی میں تماشا دیکھا ہے، جنہیں بلدیاتی نمائندہ نہیں ہونا چاہیے۔

خواجہ سعد رفیق نے مزید کہا کہ انہیں انہوں نے ٹکٹیں دی ہیں اور وہ وہاں جا کر کوئی سگریٹ کے کش لگا رہا ہے، کوئی جوتے لہرا رہا ہے، کوئی گالیاں نکال رہا ہے، پاکستان کی قومی اسمبلی سے آپ نے لنڈا بازار بنا دیا ہے ۔

پاکستان تحریک انصاف نے کہا ہے کہ رکن پنجاب اسمبلی حافظ فرحت عباس کو پولیس نے گرفتار کر لیا۔

سماجی رابطے کی ویب سائٹ ایکس پر بیان میں پی ٹی آئی کا کہنا تھا کہ ریلی کی قیادت کر رہے تھے کہ پولیس نے ان کی ریلی پر دھاوا بول دیا اور حافظ فرحت عباس کو گرفتار کر لیا

پاکستان تحریک انصاف نے کہا ہے کہ انتخابات میں مبینہ دھاندلی کے خلاف احتجاج پر ملتان میں پی ٹی آئی جنوبی پنجاب کے صدر معین ریاض قریشی اور سٹی صدر ملک عدنان ڈوگر کو گرفتار کر لیا گیا۔

اسلام آباد میں پاکستان تحریک انصاف (پی ٹی آئی) کا مہنگائی اور انتخاب میں دھاندلی کے خلاف احتجاج جاری ہے۔

تحریک انصاف کے کارکنان اسلام آباد زیرو پوائنٹ پر جمع ہونا شروع ہوگئے، کارکنان بانی پی ٹی آئی کے حق میں نعرے بازی کررہے ہیں۔

زیرو پوائنٹ سے ریلیاں پریس کلب تک جائیں گی، شعیب شاہین اور عامر مغل بھی زیرو پوائنٹ پہنچیں گے، شیر افضل مروت ریلی کی قیادت کریں گے۔

شہباز شریف نے وزارت عظمیٰ کا منصب سنبھالنے پر مالدیپ کے صدر ڈاکٹر محمد معزو اور بنگلہ دیش کی وزیر اعظم شیخ حسینہ واجد کی جانب سے مبارکباد کے پیغام پر ان کا شکریہ ادا کیا ہے۔

اتوار کو سماجی رابطے کی ویب سائٹ ایکس پر اپنے پیغام میں وزیر اعظم محمد شہباز شریف نے کہاکہ ومالدیپ کے ساتھ اپنے تعلقات کو مزید مستحکم کرنے کے لیے پر عزم ہیں ۔

ان کا مزید کہنا تھا کہ وہ بنگلہ دیش اور پاکستان کے تعلقات کو مزید مستحکم بنانے کیلئے بنگلہ دیشی ہم منصب کے ساتھ کام کرنے کے خواہشمند ہیں ۔

پاکستان تحریک انصاف (پی ٹی آئی) کے رہنما چوہدری پرویز الہی کے صاحبزادے مونس الہی نے الزام عائد کیا ہے کہ گجرات میں پولیس نے ہمارے گھر کا گیٹ باہر سے بند کر دیا ہے تاکہ میری والدہ اور خالہ پُرامن احتجاج میں شرکت نہ کر سکیں۔

پاکستان تحریک انصاف نے کہا ہے کہ پنجاب کے ضلع وہاڑی میں انتخابات میں مبینہ دھاندلی کے خلاف احتجاج کرنے والے کارکنان کو پولیس نے گرفتار کر لیا ہے۔

سماجی رابطے کی ویب سائٹ پر ایک بیان میں کہا گیا کہ تحریک انصاف ہاؤس عوامی مرکز سے پریس کلب وہاڑی تک احتجاجی ریلی نکالی گئی، جس کی قیادت سابق ایم این اے و امیدوار قومی اسمبلی طاہراقبال چوہدری نے کی۔

مزید کہا کہ احتجاج کے بعد پولیس نے عوامی مرکز دھاوا بول دیا، ضلعی صدر خواتین ونگ صائمہ نورین ایڈووکیٹ ، مہر مصطفی سیال، رانا عارف اور درجنوں پی ٹی آئی کارکنان کو گرفتا کر لیا گیا۔

الیکشن کمیشن نے پیپلز پارٹی کے چیئرمین آصف علی زرداری کے صدر مملکت منتخب ہونے کا حتمی نتیجہ جاری کردیا۔

الیکشن کمیشن نے صدارتی انتخاب کاحتمی نتیجہ فارم 7 جاری پر چیف الیکشن کمشنر نے جاری کیا، جس کے مطابق آصف زرداری 411 ووٹ لے کر کامیاب قرار پائے، جبکہ ان کے مدمقابل محمود خان اچکزئی 181 ووٹ حاصل کرسکے۔

فارم 7 کے مطابق کل 1044 ووٹ ڈالے گئے، جبکہ 9 مسترد ہوئے اس طرح درست ووٹوں کی تعداد 1035 تھی۔

آصف زرداری کو قومی اسمبلی سے 255، پنجاب اسمبلی سے 246 (43)، سندھ اسمبلی سے 151 (58) خیبرپختونخوا اسمبلی سے 17 (8) اور بلوچستان اسمبلی سے 47 ووٹ ملے، انہیں ملنے والے مجموعی ووٹ 716 تھے، جو کیکولیشن کے بعد 411 بنتے ہیں۔

محمود اچکزئی کو قومی اسمبلی سے 119، پنجاب اسمبلی سے 100 (18)، سندھ اسمبلی سے 9 (3)، خیبرپختونخوا اسمبلی سے 91 (41) اور بلوچستان اسمبلی سے کوئی ووٹ نہیں ملا، اس طرح مجموعی طور پر انہیں 319 ووٹ ملے، جو کیکولیشن کے بعد 181 بنتے ہیں۔

پاکستان تحریک انصاف نے 8 فروری کو ہونے والے عام انتخابات میں مبینہ دھاندلی کے خلاف پنجاب میں احتجاجی مقامات کی فہرست جاری کردی۔

رہنما پاکستان تحریک انصاف (پی ٹی آئی) اور سابق وزیر خارجہ شاہ محمود قریشی کی صاحبزادی مہر بانو قریشی نے کہا ہے کہ الیکشن کمیشن سے انصاف نہ ملا تو سپریم کورٹ جائیں گے۔

پی ٹی آئی کے ٹوئٹر اکاؤنٹ کے مطابق انہوں نے ملتان میں کارکنان سے خطاب کرتے ہوئے کہا کہ آپ کا گلا گھونٹا گیا ہے، آپ کے مینڈیٹ پر ڈاکا ڈالنے والوں کو چھوڑیں گے نہیں، آپ لوگوں نے ووٹ کے ذریعے مجھے جتوایا ہے۔

مزید کہنا تھا کہ انشااللہ جلد انصاف ہوگا، آپ کے ووٹ کا تقدس بحال ہوگا۔

چینی صدر شی جن پنگ نے نومنتخب صدر مملکت آصف علی زرداری کو دوسری بار صدرِ پاکستان منتخب ہونے پر مبارکباد پیش کی ہے۔

’ڈان نیوز‘ کے مطابق اپنے بیان میں چینی صدر شی جن پنگ نے آصف زرداری کے لیے نیک خواہشات کا اظہار کیا۔

انہوں نے کہا کہ دونوں ملک اچھے پڑوسی، اچھے دوست، اچھے شراکت دار اور اچھے بھائی ہیں، دونوں ملکوں نے پاک-چین اقتصادی راہداری (سی پیک) کی تعمیر میں نتیجہ خیز نتائج حاصل کیے ہیں۔

واضح رہے کہ گزشتہ روز حکمران اتحاد کے نامزد امیدوار آصف علی زرداری دوسری بار صدر مملکت منتخب ہوگئے تھے۔

14 ویں صدر مملکت کے انتخابات کے لیے قومی اسمبلی، سینیٹ اور چاروں صوبائی اسمبلیوں میں صبح 10 بجے سے شام 4 بجے تک ووٹ ڈالے گئے جس میں حکمران اتحاد کے نامزد امیدوار آصف علی زرداری نے 411 ووٹ لے کر کامیابی حاصل جب کہ ان کے مد مقابل سنی اتحاد کونسل کے امیدوار محمود خان اچکزئی نے 181 ووٹ لیے۔

نومنتخب صدر مملکت کی تقریبِ حلف برداری آج ایوان صدر میں منعقد ہوگی، آصف زرداری سے چیف جسٹس قاضی فائز عیسیٰ حلف لیں گے۔

مسلم لیگ (ن) کے رہنما بلال اظہر کیانی کا کہنا ہے کہ عارف علوی نے صدر کے عہدے کا کبھی پاس نہیں رکھا، سیاسی اتحادکےنتیجےمیں ہی آصف زرداری صدر منتخب ہوئے ہیں۔

اسلام آباد میں پریس کانفرنس کرتے ہوئے بلال اظہر کیانی نے کہا کہ سیاسی اتحاد ملک کی ضرورت تھی، ملک کے مسائل کے حل کے لیے مل کر کام کرنا ہوگا، ایک گروہ نے کسی سیاسی جماعت سے بات نہیں کی۔

ان کا کہنا تھا کہ ڈاکٹر عارف علوی قانون اور آئین شکن تھے، سیاسی اتحاد کے نتیجے میں ہی آصف زرداری صدر منتخب ہوئے۔

انہوں نے مزید کہا کہ الیکشن کے بعد کوئی ایک جماعت حکومت نہیں بناسکتی تھی۔

پاکستان تحریک انصاف آج الیکشن میں مبینہ دھاندلی کے خلاف پشاور میں رنگ روڈ پر دوپہر 2 بجے احتجاج کرے گی۔

ڈان نیوز کے مطابق مظاہرے میں وزیر اعلیٰ خیبر پختونخوا علی امین گنڈا پور شرکت کریں گے۔

8 فروری کے عام انتخابات میں مبینہ دھاندلی کے خلاف پاکستان تحریک انصاف (پی ٹی آئی) نے پارٹی کے بانی عمران خان کی کال پر آج (10 مارچ کو) ملک گیر احتجاج کا اعلان کیا ہے۔

وزیراعلیٰ بلوچستان سرفراز بگٹی نے کہا ہے کہ پیپلز پارٹی، مسلم لیگ (ن) اور دیگر جماعتوں کے نمائندوں پر مشتمل کمیٹی صوبائی کابینہ کی تشکیل کے لیے مشاورت کر رہی ہے جسے آئندہ 2 ہفتوں میں حتمی شکل دے دی جائے گی۔

ڈان اخبار کی رپورٹ کے مطابق انہوں نے کہا کہ پیپلز پارٹی بلوچستان میں نیشنل پارٹی اور آزاد امیدواروں سمیت اتحادیوں کی مشکور ہے جنہوں نے صدارتی انتخاب میں چیئرمین پیپلزپارٹی آصف علی زرداری کی حمایت کی، پیپلزپارٹی، بالخصوص آصف زرداری نے ہمیشہ بلوچستان کو اپنے دل کے قریب رکھا ہے۔

سرفراز بگٹی نے مزید کہا کہ پیپلزپارٹی نے 18ویں ترمیم کے ذریعے صوبے میں نوجوانوں کو ملازمتیں فراہم کیں، اس کی بہتری کے لیے فنڈز مختص کیے اور بلوچستان کے لوگوں کو حقوق کی فراہمی کو یقینی بنانے کے لیے تحریک شروع کی، ان اقدمات نے صوبے کے نوجوانوں کو قومی دھارے میں شامل کیا۔

انہوں نے کہا کہ ہم امید کرتے ہیں کہ پیپلزپارٹی ایک بار پھر تمام وفاقی اکائیوں کو متحد کر کے پاکستان کو مزید مضبوط بنائے گی۔

8 فروری کے عام انتخابات میں مبینہ دھاندلی کے خلاف پاکستان تحریک انصاف (پی ٹی آئی) نے پارٹی کے بانی عمران خان کی کال پر آج (10 مارچ کو) ملک گیر احتجاج کا اعلان کیا ہے۔

ایڈوکیٹ شعیب شاہین، جنہوں نے 8 فروری کو اسلام آباد سے قومی اسمبلی کی نشست کے لیے الیکشن لڑا تھا، نے ڈان کو بتایا کہ ’کارکنان دوپہر 2 بجے اسلام آباد کے زیرو پوائنٹ انٹرچینج پر جمع ہوں گے اور پھر نیشنل پریس کلب کی طرف بڑھیں گے۔‘

کراچی میں پی ٹی آئی نے ضلع ملیر میں ڈی سی آفس سے داؤد چورنگی تک مظاہروں کا اعلان کیا ہے، کورنگی نمبر 2 ، حیدری مارکیٹ، نارتھ ناظم آباد، نیا ناظم آباد میں، لیاری، شیرشاہ پراچہ چوک میں بھی پرامن احتجاج ہوگا۔

مکمل خبر پڑھنے کے لیے یہاں کلک کریں

پاکستان کے نومنتخب صدر آصف زرداری آج 14ویں صدر مملکت کی حیثیت سے حلف اٹھائیں گے۔

’ڈان نیوز‘ کے مطابق نومنتخب صدر مملکت کی تقریبِ حلف برداری آج ایوان صدر میں منعقد ہوگی، آصف زرداری سے چیف جسٹس قاضی فائز عیسیٰ حلف لیں گے۔

ایوان صدر میں ہونے والی تقریب حلف برداری میں وزیراعطم شہبازشریف، سربراہ مسلم لیگ (ن) نوازشریف، چیئرمین پیپلزپارٹی بلاول بھٹو، مسلح افواج کے سربراہان، صوبائی وزرائے اعلیٰ اور اعلیٰ سول حکام شریک ہوں گے۔

گزشتہ روز حکمران اتحاد کے نامزد امیدوار آصف علی زرداری دوسری بار صدر مملکت منتخب ہوگئے تھے۔

14 ویں صدر مملکت کے انتخابات کے لیے قومی اسمبلی، سینیٹ اور چاروں صوبائی اسمبلیوں میں صبح 10 بجے سے شام 4 بجے تک ووٹ ڈالے گئے جس میں حکمران اتحاد کے نامزد امیدوار آصف علی زرداری نے 411 ووٹ لے کر کامیابی حاصل جب کہ ان کے مد مقابل سنی اتحاد کونسل کے امیدوار محمود خان اچکزئی نے 181 ووٹ لیے۔

آصف علی زرداری کو چاروں صوبائی اسمبلیوں سے 156 الیکٹورل ووٹ ملے، محمود خان اچکزئی نے چاروں صوبائی اسمبلیوں سے 62 ووٹ حاصل کیے، آصف زرداری نے پارلیمنٹ سے 255 ووٹ حاصل کیے جب کہ محمود خان اچکزئی کو پارلیمنٹ ہاؤس سے 119 الیکٹورل ووٹ ملے۔

دوسری مرتبہ پاکستان کے صدرِ بننے والے آصف علی زرداری پہلی مرتبہ 2008 میں 5 سال کے لیے اس عہدے پر فائز ہوئے تھے۔

وزیراعلیٰ خیبرپختونخوا علی امین گنڈاپور نے چیف الیکشن کمشنر کے استعفے کامطالبہ کرتے ہوئے کہا کہ ادارے یقین دہانی کرائیں تو دوبارہ انتخابات کے لیے تیار ہیں۔

ڈان نیوز کے مطابق وزیراعلیٰ خیبرپختونخواعلی امین گنڈاپور نے کبوتر چوک جلسہ گاہ کا دورہ کیا اور انتظامات کا جائزہ لیا۔

اس موقع علی امین گنڈاپور نے کہا کہ ملک بھر میں تحریک انصاف کا مینڈیٹ چوری ہوا ہے لہٰذا اتوار کو مینڈیٹ چوری کے احتجاج اور جلسہ ہو گا۔

انہوں نے کہا کہ انتخابات سے قبل بھی کاغذات چھینے گئے اور بین الاقوامی اداروں نے بھی انتخابات کو ماننے سے انکار کیا ہے۔

وزیراعلیٰ خیبرپختونخوا نے چیف الیکشن کمشنر کے استعفے کامطالبہ کرتے ہوئے کہا کہ ادارے یقین دہانی کرائیں تو دوبارہ انتخابات کے لیے تیار ہیں۔

صدر ڈاکٹر عارف علوی نے کہا ہے کہ بطور صدر پاکستان کے عوام کی خدمت کرنا میرے لیے باعث اعزاز رہا ہے۔

ہفتہ کو سماجی رابطے کی ویب سائٹ ایکس پر اپنے ٹوئٹ میں صدر ڈاکٹر عارف علوی نے کہاکہ اللہ میری کوتاہیوں سے درگزر فرمائے اور میں نے جو اچھے اعمال کیے ہوں اس کا اجر عطا فرمائے اور ثمینہ علوی بھی میرے ساتھ اس دعا میں شامل ہیں۔

ان کا کہنا تھا کہ بطور صدر پاکستان کے عوام کی خدمت کرنا میرے لیے باعث اعزاز رہا ہے اور اس میں کوئی شک نہیں کہ ایک شاندار مستقبل ہمارے ملک کا منتظر ہے۔

ڈاکٹر عارف علوی نے کہا کہ ایکس ہینڈل پر پاکستان کے 13ویں صدر کی حیثیت سے یہ میری آخری پوسٹ ہے اور یہ اکاؤنٹ اگست 2018 میں، میں نے بنایا تھا۔

انہوں نے کہا کہ میں آج صدر پاکستان کا مکمل کنٹرول پاکستان کے 14ویں صدر کے حوالے کرنے جا رہا ہوں۔

مسلم لیگ(ن) کے رہنما عطااللہ تارڑ نے کہا ہے کہ حکومت باصلاحیت لوگوں پر مشتمل چھوٹی کابینہ تشکیل دے گی جس سے لوگوں کو مثبت پیغام ملے گا۔

جیو نیوز کے پروگرام نیا پاکستان میں گفتگو کرتے ہوئے عطااللہ تارڑ نے کہا کہ ایک چھوٹی کابینہ تشکیل دی جائے گی، وزیراعظم کا وژن ہے کہ وزارتیں ان لوگوں کو دی جائیں جو سخت محنت کر کے ملک کو بحران سے نکال سکیں۔

موجودہ حکومتی اتحاد کو مثالی قرار دیتے ہوئے مسلم لیگ(ن) کے رہنما نے کہا کہ آصف علی زرداری کے صدر منتخب ہونے سے فیڈریشن مضبوط ہوئی ہے۔

وزیراعظم میاں محمد شہبازشریف نے نومنتخب صدر مملکت آصف علی زرداری سے ان کی رہائش گاہ پر ملاقات کر کے مبارکباد پیش کی۔

وزیر اعظم شہباز شریف نے اسلام آباد کے زرداری ہاؤس جا کر آصف علی زرداری سے ملاقات کر کے صدر منتخب ہونے پر مبارکباد دی۔

وزیرِ اعظم شہباز شریف کی صدر آصف علی زرداری کو دوسری مرتبہ صدرِ پاکستان منتخب ہونے پر ان کے لیے نیک خواہشات کا اظہار کیا۔

صدر آصف علی زرداری نے صدارتی الیکشن میں حمایت پر مسلم لیگ(ن) کا شکریہ ادا کیا۔

وزیر اعظم پاکستان میاں محمد شہباز شریف آصف علی زرداری کو صدر پاکستان منتخب ہونے پر مبارکباد دینے کیلئے ان کی رہائش گاہ پہنچ گئے۔

وزیر اعظم شہباز شریف اور آصف علی زرداری کے درمیان ملاقات اسلام آباد میں زرداری ہاؤس میں ہوئی، ملاقات میں وزیرِ اعظم شہباز شریف نے آصف علی زرداری کو دوسری مرتبہ صدرِ پاکستان منتخب ہونے پر مبارکباد اور نیک خواہشات کا اظہار کیا۔

صدر آصف علی زرداری نے مسلم لیگ (ن) کی جانب سے صدر کے الیکشن میں حمایت پر شکریہ ادا کیا۔

وزیر اعظم کے ہمراہ وفد میں سینیٹر اسحٰق ڈار اور مسلم لیگ (ن) کے سیکریٹری اطلاعات عطا تارڑ بھی شامل تھے، وزیر اعظم کی آمد پر آصف علی زرداری اور سابق نگران وزیر اعلیٰ پنجاب محسن نقوی نے ان کا استقبال کیا۔

ڈپٹی چیئرمین سینیٹ مرزا محمد آفریدی نے چیئرمین سینیٹ کا عہدہ سنبھال لیا۔

سینیٹ سیکرٹریٹ نے مرزا محمد آفریدی سے متعلق نوٹیفکیشن جاری کردیا جس میں کہا گیا کہ صادق سنجرانی نے بطور رکن صوبائی اسمبلی بلوچستان حلف اٹھالیا ہے، مرزا محمد آفریدی چیئرمین سینیٹ کے طور پر فرائض سرانجام دیں گے۔