آپریشن خیبر ون: تازہ کارروائی میں 6 'دہشت گرد' ہلاک
خیبر ایجنسی: وفاق کے زیر انتظام قبائلی علاقے خیبر ایجنسی میں جاری پاک فوج کے 'آپریشن خیبر ون' کے دوران تازہ کارروائی میں 6 مبینہ دہشت گرد ہلاک ہوگئے۔
نمائندہ ڈان ڈاٹ کام نے سرکاری ذرائع کے حوالے سے بتایا ہے کہ 'آپریشن خیبر ون' کے تحت سیکیورٹی فورسز نے خیبر ایجنسی کے علاقوں آکا خیل، سپاہ اور ملک دین خیل میں کارروائی کی۔
ہفتے کو علی الصبح سیکیورٹی فورسز نے دہشت گردوں کے مبینہ ٹھکانوں کو نشانہ بنایا، جس کے نیتیجے میں 6 مبینہ دہشت گرد ہلاک ہوگئے۔
خیبر ایجنسی کے علاقے سپاہ کو لشکرِ اسلام کا مضبوط گڑھ تصور کیا جاتا ہے، جبکہ آکا خیل اور ملک دین کے علاقوں میں بھی دہشت گردوں کے ٹھکانے موجود ہیں۔
اہم شدت پسند کمانڈر نے ساتھیوں سمیت ہتھیار ڈال دیئے
دوسری جانب خیبر ایجنسی میں آپریشن خیبر ون کے دوران اہم شدت پسند کمانڈر نے اپنے پچاس ساتھیوں سمیت ہتھیار ڈال دیئے۔
نمائندہ ڈان ڈاٹ کام نے ذرائع کے حوالے سے بتایا ہے کہ خیبر ایجنسی میں آپریشن خیبر ون کے دوران کالعدم تنظیم سے تعلق رکھنے والے کمانڈر مالم نے اپنے پچاس ساتھیوں سمیت ہتھیار ڈال دیئے ہیں۔
واضح رہے کہ خیبر ایجنسی میں سیکورٹی فورسز کی جانب سے دہشت گردوں کے ٹھکانوں پر کاروائیاں جاری ہیں ۔
سرکاری ذرائع کا کہنا ہے کہ خیبر ایجنسی میں آپریشن خیبر ون دہشت گردوں کے خاتمے تک جاری رہے گا۔
گزشتہ روز بھی خیبر ایجنسی میں سیکورٹی فورسز کے ’آپریشن خیبر ون‘ کے دوران 9 مبینہ دہشت گرد ہلاک جبکہ دس زخمی ہوگئے تھے۔
مزید پڑھیں: 'آپریشن خیبر ون' کےدوران 9 مبینہ دہشت گرد ہلاک
واضح رہے کہ خیبر ایجنسی کی تحصیل باڑہ میں جاری سیکورٹی فورسز کے آپریشن میں تیزی آگئی ہے اور وادیٔ تیراہ میں مبینہ دہشت گردوں کے ٹھکانوں کی جانب سیکورٹی فورسز کی پیش قدمی بھی تیز ہوگئی ہے۔
ان کارروائیوں کو ’آپریشن خیبر ون‘ کا نام دیا گیا ہے، جس کی تجویز وزیراعظم نواز شریف کی زیر صدارت ہونے والے اجلاس کے دوران دی گئی تھی۔
یاد رہے کہ سکیورٹی فورسز کی جانب سے شمالی وزیرستان میں 15 جون کو آپریشن ضربِ عضب کا آغاز کیا گیا تھا اور علاقے میں آزاد میڈیا کی رسائی نہ ہونے کی وجہ سے تمام تر تفصیلات آئی ایس پی آر کی جانب فراہم کی جاتی ہیں۔
تاہم فوج کی جانب سے آپریشن کے آغاز کے بعد ایک مرتبہ ملکی اور غیرملکی میڈیا کو تحصیل میرعلی کا دورہ کروایا گیا تھا۔
شمالی وزیرستان کی تحصیل میرعلی کو دہشت گردوں سے خالی کروانے کے بعد سیکیورٹی فورسز نے آپریشن کا دائرہ کار شمالی وزیرستان کے دوردراز علاقوں تک بڑھا دیا ہے۔
اور اب خیبر ایجنسی اور ملحقہ علاقوں میں ’آپریشن خیبر ون‘ کے تحت سیکیورٹی فورسز نے اپنی کارروائیاں مزید تیز کردی ہیں۔
لائیو ٹی وی