ضرب عضب کے دوران 30 'دہشت گرد' ہلاک
پشاور: افغانستان سے متصل پاکستان کے دور دراز قبائلی علاقے شمالی وزیرستان میں پاک فوج کے جیٹ طیاروں کی فضائی کارروائی کے نتیجے میں 30 مبینہ دہشت گرد ہلاک جبکہ دہشت گردوں کے متعدد ٹھکانے بھی تباہ کردیئے گئے ہیں۔
نمائندہ ڈان ڈاٹ کام نے آئی ایس پی آر کے حوالے سے بتایا ہے کہ آپریشن ضرب عضب کے دوران جیٹ طیاروں نے شمالی وزیرستان کے علاقے دتہ خیل میں دہشت گردوں کے خفیہ ٹھکانوں کو نشانہ بنایا۔
جمعہ کو کی گئی فضائی کاروائی میں 30 مبینہ دہشت گردوں کی ہلاکت کی اطلاعات موصول ہوئی ہیں، جبکہ دہشت گردوں کے متعدد ٹھکانے بھی تباہ ہوئے۔
آئی ایس پی آر ذرائع کے مطابق ہلاک دہشت گردوں میں غیر ملکی بھی شامل ہیں۔
یاد رہے کہ سکیورٹی فورسز کی جانب سے شمالی وزیرستان میں 15 جون کو آپریشن ضربِ عضب کا آغاز کیا گیا تھا اور علاقے میں آزاد میڈیا کی رسائی نہ ہونے کی وجہ سے تمام تر تفصیلات آئی ایس پی آر کی جانب فراہم کی جاتی ہیں۔
تاہم فوج کی جانب سے آپریشن کے آغاز کے بعد ایک مرتبہ ملکی اور غیرملکی میڈیا کو تحصیل میرعلی کا دورہ کروایا گیا تھا۔
شمالی وزیرستان کی تحصیل میرعلی کو دہشت گردوں سے خالی کروانے کے بعد سیکیورٹی فورسز نے آپریشن کا دائرہ کار شمالی وزیرستان کے دوردراز علاقوں تک بڑھا دیا ہے۔
اور اب خیبر ایجنسی اور ملحقہ علاقوں میں ’آپریشن خیبر ون‘ کے تحت سیکیورٹی فورسز نے اپنی کارروائیاں مزید تیز کردی ہیں۔
لائیو ٹی وی