ٹور میچ: پاکستانی بیٹنگ 247 رنز پر ڈھیر
کولمبو: سری لنکن بورڈ پریذیڈنٹ الیون کے خلاف ٹور میچ کے پہلے دن پاکستانی بیٹنگ کی قلعی کھل گئی اور پوری ٹیم 247 رنز پر ڈھیر ہو گئی۔
کولمبو میں سری لنکن بورڈ پریذیڈنٹ الیون کے خلاف تین روزہ ٹور میچ کے پہلے پاکستانی کپتان مصباح الحق نے ٹاس جیت کر پہلے کھیلنے کا فیصلہ کیا جو غلط ثابت ہوا۔
دبئی کی وکٹوں پر رنز کے ڈھیر لگانے والے محمد حفیظ سری لنکا پہنچتے ہی فارم کھو بیٹھے اور تین رنز بنا کر پویلین لوٹ گئے۔
اظہر علی بھی زیادہ دیر وکٹ پر قیام نہ کر سکے اور 39 کے مجموعی اسکور پر 12 رنز بنانے کے بعد پویلین کی راہ لی۔
اس موقع پر احمد شہزاد اور یونس خان نے اننگ کو سنبھالا دیا اور تیسری وکٹ کیلئے 113 رنز کی شراکت قائم کر کے اسکور کو 152 تک پہنچا دیا۔
پاکستان کو تیسرا نقصان یونس خان کی صورت میں اٹھانا پڑا جو 64 رنز بنانے کے بعد ملندا سری وردانا کی وکٹ بنے جبکہ 176 کے مجموعے پر احمد شہزاد کی اننگ 82 رنز پر تمام ہوئی۔
احمد شہزاد کے آؤٹ ہونے بعد کوئی بھی پاکستانی بلے باز اوسط درجے کی سری لنکن باؤلنگ کا سامنا نہ کر سکا اور پوری ٹیم 247 رنز پر ڈھیر ہو گئی۔
مصباح الحق 15، اسد شفیق 27، سرفراز احمد 12، وہاب ریاض 13، یاسرشاہ 9 اور جنید خان پانچ رنز بنا کر پویلین لوٹے۔
پاکستانی اننگ کی اس تباہی کے ذمے دار جیفری وینڈرسے تھے جنہوں نے پانچ پاکستانی کھلاڑیوں کو میدان بدر کیا۔
جواب میں سری لنکن بورڈ پریذیڈنٹ الیون کا آغاز بھی کچھ اچھا نہ تھا اور صفر کے اسکور پر اوپنر دمتھ کرونا رتنے وکٹوں کے سامنے پیڈ لانے کی پاداش میں آؤٹ قرار پائے۔
اس کے بعد کشال سلوا اور اپل تھارنگا نے دن کے اختتام تک مزید کوئی اور وکٹ نہ گرنے دی۔
جب پہلے دن کا کھیل ختم ہوا تو سری لنکا نے ایک وکٹ کے نقصان پر 44 رنز بنائے تھے اور اسے پاکستان کی پہلی اننگ کا اسکور برابر کرنے کے لیے مزید 203 رنز درکار ہیں۔
پاکستان اور سری لنکا کے درمیان تین ٹیسٹ میچوں پر مشتمل سیریز کا آغاز 17 جون سے گال میں ہو گا۔
لائیو ٹی وی