اسلام آباد: صوبہ خیبر پختونخوا کے ضلع مانسہرہ میں واقع ہزارہ ہونیورسٹی کو وزیراعظم نواز شریف کے دورے کے پیش نظر 2 دن کے لیے بند کردیا گیا۔

ڈپٹی رجسٹرار اسٹیبلشمنٹ کی جانب سے جاری کیے گئے نوٹیفکیشن کے مطابق 'تمام متعلقہ افراد کو مطلع کیا جاتا ہے کہ وزیراعظم نواز شریف کے دورے کے پیش نظر ہزارہ یونیورسٹی 27 اور 28 اپریل 2016 کو بند رہے گی۔'

نوٹیفکیشن میں بوائز ہاسٹل کے طلبہ کو 27 اپریل (بروز بدھ) کو شام 4 بجے تک ہاسٹل خالی کرنے کی ہدایت، جبکہ گرلز ہاسٹل میں رہائش پزیر طالبات سے کہا گیا ہے کہ وہ 27 اپریل کی شام سے لے کر 28 اپریل (بروز جمعرات) کی شام تک ہاسٹل تک ہی محدود رہیں۔

بعدازاں طلبا کی جانب سے اچانک یونیورسٹی بند کرنے پر انتظامیہ کے خلاف احتجاج کیا گیا۔

انتظامیہ کی جانب سے ہاسٹل بند نہ کرنے کی یقین دہانی پر احتجاج ختم کردیا گیا۔

مزید کہا گیا کہ یونیورسٹی کے تمام دفاتر معمول کے مطابق کھلے رہیں گے۔

دوسری جانب یونیورسٹی کی حدود میں چیکنگ کے لیے بم ڈسپوزل اسکواڈ کو بھی طلب کیا گیا ہے۔

واضح رہے کہ وزیراعظم نواز شریف جمعرات 28 اپریل کو ہزارہ یونیورسٹی میں ایک عوامی جلسے سے خطاب کریں گے، وزیراعظم کا یہ دورہ ان کی عوامی جلسوں سے خطاب کی حکمت عملی کا ہی ایک حصہ ہے جس کے تحت 2 روز قبل انھوں نے ضلع راولپنڈی کے علاقے کوتلی ستیاں میں بھی ایک عوامی جلسے سے خطاب کیا تھا۔

آپ موبائل فون صارف ہیں؟ تو باخبر رہنے کیلئے ڈان نیوز کی فری انڈرائیڈ ایپ ڈاؤن لوڈ کریں۔