سابق وزیر وزیرِ خزانہ نوید قمر نے مالی سال 16-2015 کے جاری کردہ اقتصادی سروے میں حکومتی ناکامی کو تشویشناک قرار دیا۔

ڈان نیوز کے پروگرام نیوز آئی میں گفتگو کرتے ہوئے انھوں نے کہا کہ حکومت کو اگر اہداف حاصل کرنے تھے تو اسے چاہیے تھا کہ وہ آئی ایم ایف کی طرف سے دیے گئے اعداد و شمار کو سامنے رکھتی، تاکہ اس بات کا پتہ لگایا جاسکتا کہ بجٹ خسارہ کیا ہوگا۔

ان کا کہنا تھا کہ یہی وجہ ہے کہ حکومت ہر سال مالی بجٹ میں اہداف حاصل کرنے میں ناکام رہتی ہے۔

زرعی شعبے کے حوالے سے بات کرتے ہوئے سابق وزیر خزانہ کا کہنا تھا کہ اس مرتبہ حکومت نے کھاد سمیت دیگر اشیاء کی قیمتوں میں اضافہ کیا اور درآمدات کو کم کردیا، جو بڑی غلطی تھی۔

مزید پڑھیں: اقتصادی سروے پیش، حکومت معاشی ترقی کا ہدف حاصل کرنے میں ناکام

خیال رہے کہ گزشتہ روز مالی سال 16-2015 کا اقتصادی سروے پیش کرتے ہوئے وزیر خزانہ نے زرعی شعبے میں ناکامی کا اعتراف کرتے ہوئے غیر ملکی زر مبادلہ کی ریکارڈ ترین بلند سطح کی نوید بھی سنائی۔

وزیر خزانہ نے یہ بھی کہا تھا کہ پاکستان کو کسی نئے آئی ایم ایف پروگرام کی ضرورت نہیں ہے۔

آپ موبائل فون صارف ہیں؟ تو باخبر رہنے کیلئے ڈان نیوز کی فری انڈرائیڈ ایپ ڈاؤن لوڈ کریں۔