'ملک انٹرنیٹ پر چل رہا ہے'
عوامی مسلم لیگ کے سربراہ شیخ رشید احمد نے کہا ہے کہ اس وقت وزیراعظم 'جلا وطن' ہیں جبکہ ملک انٹرنیٹ پر چل رہا ہے۔
ڈان نیوز کے پروگرام دوسرا رُخ کو دیے گئے ایک خصوصی انٹرویو میں عوامی مسلم لیگ کے سربراہ کا کہنا تھا کہ ان حالات میں فوج فیصلے کرنے والی ہے، لیکن سیاستدانوں کی وجہ سے وہ کوئی واضح فیصلہ نہیں کر پا رہی۔
انھوں نے موجودہ حالات میں سب سے بڑا مسئلہ قیادت کے فقدان کو قرار دیا۔
شیخ رشید نے یہ بھی کہا کہ اس مرتبہ چھوٹی عید اور بڑی عید کے درمیان عوامی عید ہوگی، لیکن کوئی ڈیڈلائن اس کیلیے نہیں دے سکتا، کیونکہ اس دوران کوئی حادثہ بھی ہوسکتا ہے۔
انھوں نے کہا کہ سب کو معلوم ہے کہ ملک میں فیصلے کون کر رہا ہے اور حال ہی میں جنرل ہیڈکوارٹرز میں سیاسی اور عسکری قیادت کے درمیان ہونے والے ملاقات میں فوج نے حکومت سے ناراضگی کا اظہار کیا تھا۔
مزید پڑھیں: خطے کی صورتحال، جی ایچ کیو میں اعلیٰ سطح کا اجلاس
انھوں نے نواز شریف کی بیماری کو اداکاری قرار دیا اور کہا کہ میں نے اپنی زندگی میں ایسا مریض نہیں دیکھا جو اوپن ہارٹ سرجری کے فوراً بعد خود سے سیڑھیاں اتر کر نیچے آئے۔
'پاناما لیکس مسئلے کا حل صرف سڑکوں پر ہے'
پاناما لیکس میں ہونے والے انکشافات کے بعد موجودہ بحران پر بات کرتے ہوئے ان کا کہنا تھا کہ اس مسئلے کو صرف سڑکوں پر آکر ہی حل کیا جاسکتا ہے۔
انھوں نے مزید کہا کہ پہلے سے معلوم تھا کہ ٹی او آرز پر بننے والی کمیٹی بے نتیجہ رہے گی، کیونکہ ابھی تک دونوں طرف ڈیڈ لاگ برقرار ہے۔
یہ بھی پڑھیں: شریف خاندان کی 'آف شور' کمپنیوں کا انکشاف
شیخ رشید کا یہ بھی کہنا تھا کہ اگر عمران خان باہر نہیں نکلے تو ان کی سیاست ختم ہوجائے گی۔
اس سوال پر کہ کیا آپ پیچھلے دھرنے کی وجہ سے عمران خان سے ناراض ہیں؟، تو ان کا کہنا تھا کہ وہ عمران خان سے نہیں لیکن ان کی جماعت کی کارکردگی کی وجہ سے کچھ اختلافات ہیں۔
انھوں نے دعویٰ کیا کہ اس بار جے یو آئی – ف کے علاوہ باقی تمام اپوزیشن جماعتیں سڑکوں پر ہوں گیں اور ہوسکتا ہے کہ پیپلز پارٹی بھی میدان میں آجائے، کیونکہ کوئی دوسرا راستہ موجود نہیں اوراگر لوگ سڑکوں پر نکلے تو نواز شریف کو گھر جانا ہوگا۔
آپ موبائل فون صارف ہیں؟ تو باخبر رہنے کیلئے ڈان نیوز کی فری انڈرائیڈ ایپ ڈاؤن لوڈ کریں۔
لائیو ٹی وی