بلوچستان میں فورسز کی کارروائی، 5 'عسکریت پسند' ہلاک

سید علی شاہ شائع November 30, 2016

صوبہ بلوچستان کے ضلع سبی میں سیکیورٹی فورسز نے کارروائی کے دوران 5 عسکریت پسندوں کو ہلاک کرنے کا دعویٰ کیا ہے۔

فرنٹئر کور (ایف سی) کے ترجمان نے بتایا کہ سیکیورٹی فورسز نے کارروائی کے دوران سبی ہی میں عسکریت پسندوں کے زیر استعمال 3 محفوظ ٹھکانوں کو تباہ بھی کیا'۔

ان کا کہنا تھا کہ ایف سی اور حساس اداروں نے سبی کے علاقے تالی میں مشترکہ کارروائی کے دوران مقابلے میں 5 عسکریت پسندوں کو ہلاک کردیا۔

سیکیورٹی فورسز نے مذکورہ عسکریت پسندوں کے قبضے سے بارودی سرنگیں اور دیگر اسلحہ برآمد کیا ہے۔

ترجمان نے بتایا کہ ہلاک ہونے والے عسکریت پسند سرکاری تنصیبات، سیکیورٹی فورسز اور مسافر ٹرینوں پر حملے میں ملوث ہیں۔

خیال رہے کہ ضلع سبی اور اس کے اطراف کے علاقے انتہائی حساس تصور کیے جاتے ہیں کیونکہ یہاں ایک دہائی سے سیکیورٹی فورسز سمیت دیگر کو نشانہ بنایا جارہا ہے۔

گذشتہ روز صوبہ بلوچستان کے ضلع ڈیرہ بگٹی میں سیکیورٹی فورسز نے مقابلے میں 2 مبینہ عسکریت پسندوں کو ہلاک کرنے کا دعویٰ کیا تھا۔

صوبہ بلوچستان میں مختلف کالعدم تنظیمیں، سیکیورٹی فورسز اور پولیس اہلکاروں پر حملوں میں ملوث رہی ہیں جبکہ گذشتہ ایک دہائی سے صوبے میں فرقہ وارانہ قتل و غارت میں اضافہ ہوا ہے۔

یہ بھی پڑھیں: کوئٹہ حملے میں ملوث لشکر جھنگوی کے 4 عسکریت پسند ہلاک

واضح رہے کہ رواں برس کوئٹہ میں دہشت گردی کے مختلف واقعات رونما ہوئے، 28 جون 2016 کو کوئٹہ میں فائرنگ کے 2 مختلف واقعات میں 4 پولیس اہلکار ہلاک ہوگئے تھے۔

8 اگست کو کوئٹہ سول ہسپتال کے باہر دھماکے کے نتیجے میں 70 افراد ہلاک اور 112 سے زائد زخمی ہوئے تھے، ہلاک ہونے والوں میں ڈان نیوز کا کیمرہ مین بھی شامل تھا جبکہ اکثریت وکلا کی تھی جو بلوچستان بارکونسل کے صدر انور بلال کاسی کے قتل کی خبر سن کرہسپتال پہنچے تھے۔

13 ستمبر 2016 کو کوئٹہ کے علاقے سریاب روڑ پر پولیس ٹریننگ کالج کے قریب دھماکا ہوا تھا جس میں 2 پولیس اہلکار ہلاک اور 8 افراد زخمی ہوگئے تھے۔

اس کے علاوہ پولیس ٹریننگ کالج ماضی میں 2008 اور 2006 میں بھی دہشت گردوں کے حملوں کی زد میں آیا تھا جہاں کالج کے میدان میں راکٹ فائر کئے گئے تھے۔