صوبہ سندھ کے ضلع شکار پور کی تحصیل خانپور میں دو گروہوں میں زمین کے تنازع پر ہونے والے مسلح تصادم کے دوران فائرنگ کے نتیجے میں 12 افراد ہلاک ہوگئے۔

ڈان نیوز کی رپورٹ کے مطابق خانپور میں کچے کے علاقے میں جتوئی برادری کے دو گروہوں میں زمین کا تنازع جاری تھا اور آج (3 جولائی) کو اُس وقت مسلح تصادم ہوگیا جب دونوں گروہ آمنے سامنے آگئے۔

مذکورہ مسلح تصادم میں ہلاک ہونے والوں میں 3 خواتین اور 9 مرد شامل ہیں۔

ایس ایس پی قمبر شہداد کوٹ ساجد امیر سدوزئی نے تصادم میں 12 افراد کی ہلاکت 15 کے زخمی ہونے کی تصدیق کرتے ہوئے کہا کہ علاقے میں داخل ہونے کی کوشش پر مسلح گروہوں کی جانب سے پولیس پر بھی راکٹ لانچر فائر کیے گئے، جس کے باعث پولیس موقع پر نہیں پہنچ سکی۔

ان کا کہنا تھا کہ پولیس نے علاقے کو گھیرے میں لے لیا ہے اور مسلح افراد کے نکلنے کے تمام راستے بند کر دیئے گئے ہیں۔

سابق رکن اسمبلی ڈاکٹر ابراہیم جتوئی نے پولیس پر الزام لگایا کہ پولیس علاقے میں جرائم پیشہ افراد کی بیخ کنی کے بجائے انہیں تحفظ فراہم کرتی ہے، جس کے باعث ایسے واقعات پیش آرہے ہیں۔

دونوں گروہوں کے درمیان فائرنگ کا تبادلہ تاحال جاری ہے جبکہ ایک دوسرے پر راکٹ بھی فائر کیے جارہے ہیں۔