’عمران خان اسلام آباد اور بنوں سے کلیئر‘
الیکشن کمیشن پاکستان ( ای سی پی ) کے ایپلٹ ٹریبیول نے پاکستان تحریک انصاف ( پی ٹی آئی ) کے چیئرمین عمران خان کے اسلام آباد کے حلقہ این اے 53 اور بنوں کے حلقہ این اے 35 سے کاغذات نامزدگی منظور کرتے ہوئے انہیں انتخابات لڑنے کی اجازت دے دی۔
خیال رہے کہ عمران خان کے کاغذات نامزدگی بھی سابق وزیر اعظم شاہد خاقان عباسی اور پی ٹی آئی گلالئی کی رہنما عائشہ گلالئی کے کاغذات نامزدگی کی طرح مسترد ہوئے تھے کیونکہ وہ شق ’این‘ بھرنے میں ناکام رہے تھے۔
واضح رہے کہ کاغذات نامزدگی میں موجود شق این میں اپنے گزشتہ حلقے میں ان کی شراکت داری کے بارے میں پوچھا جاتا ہے۔
جسٹس محسن اختر کیانی کی سربراہی میں اسلام آباد ہائیکورٹ کے ایپلٹ ٹریبیونل نے عمران خان کے خلاف دائر اعتراضات پر سماعت کی، اس دوران تحریک انصاف کے چیئرمین عدالت میں پیش ہوئے اور نامکمل کاغذات نامزدگی میں شق ’این ‘ کو مکمل کیا۔
دوسری جانب بنون کے حلقہ این اے 35 سے بھی عمران خان کو انتخابات لڑنے کی اجازت دے دی گئی۔
درخواست گزار کی جانب سے اعتراض کیا گیا تھا کہ عمران خان نے ایک بیٹی ٹیرئن کا نام کاغذات میں ظاہر نہیں کیا، تاہم ایپلٹ ٹریبیونل نے عدم ثبوت کی بناء پر یہ اعتراض مسترد کردیا۔
لائیو ٹی وی