الیکشن میں کچھ ’ادائیں‘ نظر آئیں گی، فضل الرحمٰن
اسلام آباد: متحدہ مجلس عمل (ایم ایم اے) پاکستان کے صدر مولانا فضل الرحمٰن نے ملک گیر جلسوں کا اعلان کرتے ہوئے کہا ہے کہ شفاف انتخابات پر یقین ہے البتہ کچھ ادائیں نظر آرہی ہیں۔
ایم ایم اے کی سپریم کونسل کا اجلاس کے بعد سراج الحق، ساجد نقوی اور اویس نورانی کے ساتھ مشترکہ پریس کانفرنس کرتے ہوئے مولانا فضل الرحمٰن کا کہنا تھا کہ انتخابات میں منظم انداز اور متفقہ امیدواروں کے ساتھ میدان میں اترنے کے لئے ہوم ورک کی ضرورت تھی جو مکمل ہوگیا ہے۔
انہوں نے کہا کہ مرکزی سطح پر عوامی رابطہ مہم کا آغاز کیا جارہا ہے ،13 جولائی کو ملتان، 14 جولائی راولپنڈی اور 15 جولائی کو کراچی میں جلسہ عام ہوگا،21 جولائی ایبٹ آباد اور 22 جولائی سے ملاکنڈ تک کے علاقوں کا دورہ کریں گے۔
ایم ایم اے کے صدر نے بتایا کہ قومی اسمبلی میں 191، چاروں صوبوں سے 404 ارکان اور 35 خواتین جنرل نشستوں پر ایم ایم اے پلیٹ فارم سے اتریں گے۔
پریس کانفرنس میں ایک صحافی نے سوال کیا کہ عمران خان کہتے ہیں کہ مولانا ہر حکومت سے مقناطیس کی طرح چمٹ جاتے ہیں جس پر مولانا فضل الرحمٰن نے جواب دیا کہ مقناطیس چمٹتا نہیں ہے بلکہ دوسروں کو کھینچتا ہے۔
لائیو ٹی وی