امریکی گلوکارہ جیسیکا سمسن کی نئی تصویر سامنے آنے کے بعد کسی کو بھی اسے دیکھ کر یقین نہیں آرہا کہ وہ تین بچوں کی ماں ہیں۔

گلوکارہ کے ہاں 6 ماہ قبل بیٹی کی پیدائش ہوئی تھی جس کا نام انہوں نے برڈی مے جونسن رکھا تھا۔

گزشتہ کئی سالوں میں جیسیکا کا وزن کافی حد تک بڑھ چکا تھا جس کے باعث انہیں انٹرنیٹ پر شدید تنقید کا سامنا رہا جبکہ انہیں خود بھی اپنی شخصیت پسند نہیں آتی تھی۔

تاہم اب انہوں نے انسٹاگرام پر ڈالی گئی اپنی ایک تصویر کے ساتھ اعلان کیا کہ انہوں نے 6 ماہ میں 100 پاؤنڈ یعنی 45 کلو وزن کم کرلیا ہے جبکہ اس تبدیلی کی تصویر کو بھی ان کے مداح بےحد پسند کررہے ہیں۔

جیسیکا کے مطابق انہیں ایسا لگنے لگا تھا کہ وہ دوبارہ کبھی پہلے جیسی نہیں ہوپائیں گی لیکن وزن کم کرنے کے لیے انہوں نے بےحد محنت کی اور اب انہیں خود پر فخر ہے۔

اس تصویر میں گلوکارہ سیاہ رنگ کے لباس میں موجود ہیں۔

39 سالہ گلوکارہ سے قریبی ذرائع کا اس حوالے سے کہنا تھا کہ جیسیکا نے بے حد محنت کی تب جاکر ان کے وزن میں یہ مثبت تبدیلی آئی۔

انہوں نے مزید کہا کہ 'انہوں نے اپنا ایک مقصد بنایا اور پھر اسے حاصل کرنے کی ہر ممکن کوشش کی، وہ پہلے اپنی شخصیت کو ناپسند کرنے لگی تھی اور دوبارہ وزن کم کرکے پہلے جیسا ہونا چاہتی تھیں'۔

لیکن کیا آپ جانتے ہیں کہ گلوکارہ جیسیکا سمسن نے صرف 6 ماہ میں اپنا وزن اس حد تک کم کیسے کیا؟

ذرائع کے مطابق گلوکارہ نے سب سے زیادہ باقائدگی سے چہل قدمی پر زور دیا، یہ ان کی پسندیدہ ورزش تھی اور وہ ایک دن میں بہت زیادہ چہل قدمی کرتی تھیں۔

خیال رہے کہ جیسیکا سمسن کی شادی امریکی فٹ بالر ایرک جونسن کے ساتھ 2014 میں ہوئی تھی۔