پاکستان کی تاریخ میں پہلی بار خواتین نیزہ بازی کی 3 رکنی ٹیم انٹرنیشنل چمپئن شپ میں حصہ کے لیے اردن روانہ ہوگئی۔

ایکویسٹرئین فیڈریشن آف پاکستان (ای ایف پی) سے جاری بیان کے مطابق قومی خواتین نیزہ بازی کی 3 رکنی ٹیم بین الاقوامی ٹینٹ پیگنگ چمپئن شپ میں شرکت کے لیے اردن روانہ ہوگئی ہے۔

بیان میں کہا گیا کہ ٹینٹ پیگنگ چمپئن شپ میں نیزہ بازی کے مقابلے 22 سے 24 ستمبر تک اردن کے شہر پیڑا میں منعقد ہوں گے۔

قومی ٹیم کے کوچ ہارون نے کہا کہ پاکستان کی تاریخ میں پہلی بار خواتین کی قومی ٹیم اوپن ٹرائل کے ذریعے منتخب ہوئی ہے اور میڈیا رپورٹس کے مطابق ان کھلاڑیوں میں کنزیٰ فرحت، عائشہ احمد خان اور زویہ میر شامل ہیں۔

صدر ای ایف پی صاحبزادہ سلطان نے کہا کہ پاکستان ویمن ٹیم پہلی بار کسی بڑے انٹرنیشنل ایونٹ میں شرکت کر رہی ہے۔

انہوں نے کہا کہ ٹیم کی تیاری اچھی ہے اور پرامید ہوں کہ ٹیم اچھی کارکردگی کا مظاہرہ کرے گی۔

خیال رہے کہ پاکستانی خواتین کی نیزہ بازی کی ٹیم کا انتخاب ایکوسٹرین فیڈریشن آف پاکستان کے زیر اہتمام اوپن ٹرائلز کے بعد کیا گیا۔

پاکستانی خواتین کی ٹینٹ پیگنگ ٹیم کا یہ پہلا بڑا ایونٹ ہے تاہم اس سے قبل وہ جنوبی افریقہ کا تربیتی دورہ کر چکی ہے۔

اردن میں ہونے والی عالمی چمپیئن شپ میں دنیا کے متعدد ممالک شرکت کر رہے ہیں، جن میں بھارت، روس، برطانیہ، جنوبی افریقہ اور عمان بھی شامل ہیں۔