پاکستان بھر میں کروڑوں شہری تین ماہ کے دوران دوسری مرتبہ بجلی کے بدترین تعطل سے متاثر ہوئے جہاں ملک کے تقریباً تمام علاقوں میں بجلی کا نظام درہم برہم ہوگیا۔

راولپنڈی میں مقامی تاجر 71 سالہ محمد افتخار شیخ نے بتایا کہ انہیں الیکٹرک اشیا کی فروخت میں مشکل کا سامنا کرنا پڑ رہا ہے۔

انہوں نے کہا کہ صارفین الیکٹرک چیزیں آزمائش کے بغیر نہیں خریدتے اور ہم سب بغیر کام کے بیٹھے ہوئے ہیں۔

اسی طرح اسکولوں میں بھی اندھیروں کا راج رہا یا پھر بیٹری کے ذریعے روشنی کا انتظام کیا گیا۔

خبرایجنسی اے ایف پی کو کراچی میں ایک دکان دار نے بتایا کہ انہیں خدشہ ہے ان کا تمام ڈیری اسٹاک ضائع ہوجائے گا کیونکہ ریفریجریٹر بند پڑے ہیں۔

پرنٹنگ کے کام سے منسلک 39 سالہ خرم کا کہنا تھا کہ بجلی کے تعطل کی وجہ سے آرڈرز میں تاخیر ہو رہی ہے، بجلی کی بے یقینی صورت حال بدستور ایک مسئلہ ہے اور ہماری حکومت اس پر قابو پانے میں ناکام ہوگئی ہے۔