وزیراعظم کا ڈیجیٹل انوسٹمنٹ فورم میں آئی ٹی کے شعبے میں 70 کروڑ ڈالر کی سرمایہ کاری کا خیرمقدم
وزیراعظم شہباز شریف نے ڈیجیٹل انوسٹمنٹ فورم میں انفارمیشن ٹیکنالوجی (آئی ٹی) کے شعبے میں مجموعی طور پر 70 کروڑ ڈالر کی سرمایہ کاری کا خیر مقدم کرتے ہوئے کہا کہ پاکستانی قوم میں نہ صرف ملکی بلکہ عالمی معیشت کی ترقی میں مرکزی کردار ادا کرنے کی صلاحیت موجود ہے۔
ایسوسی ایٹڈ پریس آف پاکستان (اے پی پی) کے مطابق بدھ کو وزیر اعظم میڈیا آفس سے بیان جاری کیا گیا جس میں کہا گیا کہ شہباز شریف کی زیر صدارت ایف بی آر میں ڈیجیٹل و دیگر اصلاحات کے عمل میں سرمایہ کاروں کی شمولیت اور مواقع کے حوالے سے اجلاس ہوا۔
اجلاس میں وزیر خزانہ محمد اورنگزیب، وزیر آئی ٹی شزا فاطمہ خواجہ، سیکریٹری جنرل ڈیجیٹل کوآپریشن آرگنائزیشن دیمہ الیحییٰ ، بین الاقوامی آئی ٹی کمپنیوں کے سی ای او اور متعلقہ اداروں کے افسران نے شرکت کی۔
اجلاس میں شرکا کو ایف بی آر میں ڈیجیٹل اصلاحات کے عمل کے مختلف مراحل اور اس میں موجود سرمایہ کاری کے مواقع سے آگاہ کیا گیا۔
اجلاس کو بتایا گیا کہ ایف بی آر میں ڈیجیٹل مانیٹرنگ، ٹریک اینڈ ٹریس، ڈیجیٹل تحقیق و تجزیات اور دیگر اصلاحات پر کام کیا جا رہا ہے جن میں سے متعدد نافذ العمل ہو چکی ہیں۔
مزید بتایا گیا کہ ایف بی آر میں ڈیجیٹل انوائسنگ، فیس لیس ٹیکنالوجی، کارگو ٹریکنگ اور دیگر ڈیجیٹل اصلاحات میں مجموعی طور پر 10 کروڑ ڈالر سے زائد کے سرمایہ کاری کے مواقع موجود ہیں۔
وزیراعظم نے ڈیجیٹل کوآپریشن کانفرنس کے تحت ہونے والے ڈیجیٹل انوسٹمنٹ فورم میں پاکستان کے آئی ٹی شعبے میں مجموعی طور پر 70 کروڑ ڈالر کی سرمایہ کاری کو سراہا ۔
اس موقع پر ان کا کہنا تھا کہ بین الاقوامی سطح پر پاکستانی کاروباری برادری اپنا لوہا منوا رہی ہے، آئی ٹی کے شعبے میں پاکستانی کاروباری افراد عالمی مارکیٹ میں قابل قدر خدمات پیش کر رہے ہیں۔
انہوں نے کہا کہ اس بات میں کوئی شک نہیں کے پاکستانی قوم میں نہ صرف ملکی بلکہ عالمی معیشت کی ترقی میں مرکزی کردار ادا کرنے کی صلاحیت موجود ہے۔
وزیراعظم نے کہا کہ پاکستان میں آئی ٹی سمیت ہر شعبے میں دنیا کے بہترین ماہرین موجود ہیں اگر ان کو استعداد اور صلاحیتوں کے مطابق موقع دیا جائے تو وہ بہترین نتائج دے سکتے ہیں۔
ان کا کہنا تھا کہ حکومت ملکی آئی ٹی اور دیگر شعبوں میں اصلاحات کے عمل میں پاکستانی سرمایہ کار برادری کو شامل کرنے ترجیح دے گی جب کہ پاکستانی سرمایہ کار کے ذریعے ہمیں دیر پا، بہتر اور پائیدار نتائج حاصل ہوں گے۔
انہوں نے آئی ٹی کے شعبے کے سرمایہ کاروں کو ایف بی آر میں ڈیجیٹل اصلاحات میں سرمایہ کاری کے مواقع سے آگاہ کرنے کے لیے خصوصی ویبینار منعقد کرنے کی ہدایت کردی۔
لائیو ٹی وی